Oblys ortalyǵyndaǵy Dostyq úıinde «Otbasy ortalyǵy» jáne «Tatýlastyrý ortalyǵy» dep atalatyn arnaıy oryndar ashyldy. Oblystyq sottyń bastamasymen júzege asqan bul jobalar daýlardy sotqa deıin jáne sottan tys retteý ınstıtýtyn qoldanýǵa, neke buzý prosesinen týyndaıtyn daýlar sanyn azaıtýǵa baǵyttalǵan.
Ortalyqta etnomádenı birlestik ókilderi, kásibı medıatorlar, psıhologtar men qorǵaýshylar, jumyspen qamtý jáne daǵdarys ortalyqtarynyń ókilderi jumys isteıdi. Tatýlastyrý ortalyqtarynda tegin qyzmet kórsetiledi jáne júgingen adamdardyń ótinishteri qupııa saqtalady.
Oblystyq sottyń azamattyq ister jónindegi sot alqasynyń tóraǵasy Manat Kómirshınov otbasylyq qundylyqtardy saqtaý jáne azamattar arasynda berik qarym-qatynasty qalyptastyrý maqsatynda atqarylyp jatqan sharalardy atap ótti. «Zańdar ýaqyt pen jaǵdaılarǵa baılanysty ózgerýi múmkin bolǵanymen, otbasylyq qundylyqtar turaqty bolýy tıis. Barlyq jaqsylyq ataýly otbasynan bastaý alady. Osyndaı ortalyqtardy qura otyryp, azamattarǵa otbasyn saqtaýlary úshin kómek kórsetýimiz kerek, – deıdi M.Kómirshınov.
Bir ókinishtisi, Atyraýda ajyrasqan otbasylar sany artyp otyr. О́tken jyly nekege turǵan bes myńǵa jýyq juptyń 30 paıyzy ajyrasqan. Otbasy jáne tatýlastyrý ortalyqtary sekildi jobalardyń ózekti ekenin osydan da ańǵarýǵa bolady.
Baqytgúl BABASh,
«Egemen Qazaqstan»
Atyraý