Jyldar boıy sábı súıe almaı júrgen erli-zaıyptylardyń ekstrakorporaldyq uryqtandyrý ádisi №3 qalalyq aýrýhanada júzege asyrylady.
Osynda reprodýksııa bólimshesi ashylǵaly jasandy jolmen 23 sábı dúnıege kelgen. Aq halattylardyń aıtýynsha, otbasylardyń bala súıe almaýyna kóbine er men áıeldiń densaýlyǵyndaǵy dimkástik nemese fızıologııalyq úılesimsizdik sebep bolýy múmkin. Biraq medısınanyń búgingideı qaryshtap damyǵan kezinde bedeýlik aqyrǵy úkim emes. Sońǵy jyldary názikjandylar arasynda ekstrakorporaldyq uryqtandyrýdyń kómegine júginýshiler qatary artyp keledi. Jurtshylyqqa bul prosedýra “EKO” degen qysqartylǵan ataýmen tanys. Mundaı jasandy reprodýksııa bólimshesi qalalyq №3 aýrýhana bazasynda 2012 jyldan beri jumys isteıdi. Zerthanalyq jolmen dúnıege kelgen alǵashqy soltústikqazaqstandyq egiz ul men qyz bıyl 6 jasqa tolady. Budan keıin óńirde ekstrakorporaldyq uryqtandyrý arqyly taǵy 21 sábı týǵan.
«Jurtshylyqqa olardyń tabıǵı jolmen týǵan balalardan esh aıyrmashylyǵy joq ekendigin túsindirý óte qıyn. Sondyqtan, ata-analar qoǵamnyń qyzý talqysyna ushyraımyz dep jasqanshaqtaıdy. Ekstrakorporaldyq uryqtandyrý bala súıe almaı júrgen erli-zaıyptylardyń armanyna qol jetkizýlerine múmkindik beretinin basa aıtqym keledi», deıdi reprodýktolog dáriger Olga Zvıagına.
Ol zerthanada dáriger-reprodýktolog erli-zaıyptynyń jynystyq jasýshalaryn jasandy jolmen uryqtandyratynyn, nátıjesinde paıda bolǵan embrıondardyń birnesheýi bolashaq ananyń qursaǵyna endiriletinin jetkizdi. Áıel jatyrynda embrıondardyń ekige bólinýi de ǵajap emes. Ondaıda ómirge egiz sábıler dúnıege keledi. Al synamada qalǵan ózge embrıondardy qalaýlary boıynsha konservileýge bolady. Olar 25 jylǵa deıin saqtalady. Konservilengen embrıondardy paıdalaný múmkindigi bar.
Búginde ekstrakorporaldyq uryqtandyrýdy bir ret jasaý quny 424 myń teńgeni quraıdy. Budan bólek “Eko plıýs Iksı” baǵdarlamasy bar. Onyń baǵasy – 524 myń 682 teńge.
Petropavldaǵy reprodýksııa bólimshesi ekstrakorporaldyq uryqtandyrý prosedýrasyn tek aqyly túrde júrgizedi. Sábı súıe almaı júrgen juptardyń memlekettik kvotaǵa ıe bolý múmkindigi de joq emes. Bıylǵy jyly el qazynasynyń qarajaty esebinen 25 soltústikqazaqstandyq otbasy eko jasatqan. Biraq, tegin uryqtandyrý tek Almaty, Astana jáne Taraz qalalarynda jasalady.
О́ńirde áıelderdi júkti etýdiń taǵy birneshe ádisi qoldanylady. Solardyń biri – jatyrishilik ınsemınasııa. Bul jaǵdaıda kóbine jalǵyzbasty názikjandylar donordyń kómegimen balaly bolady.
О́mir ESQALI,
«Egemen Qazaqstan»
Soltústik Qazaqstan oblys