«Jastar jyly» aıasynda oblystyq polısııa departamentiniń bastamashyldyǵymen uıymdastyrǵan «Esirtkige qarsy kúres» marafony óskeleń urpaqty qurdymǵa aparatyn qasiretti joldyń aldyn alýǵa, boldyrmaýǵa, saqtandyrýǵa, jaqsy dástúrlerdi nasıhattaýǵa baǵyttaldy.
Joǵary synyp oqýshylary, kolledj stýdentteri, úkimettik emes uıymdar , memlekettik organdar ókilderiniń qatysýymen ótken basqosýda aımaq basshysynyń orynbasary Madııar Qojahmet Elbasy «Jastar jylynyń» ashylý saltanatynda sóılegen sózinde salamatty ómir súrý saltyna zor mańyz bergenin,tálim-tárbıe salasy boıynsha birqatar mindetter qoıǵanyn atap ótti. «Esirtkisiz bolashaq» aksııasy jan-jaqty qoldaý tabatynyna senim bildirdi.
Jınalǵandar nazaryna esirtki bıznesine qarsy kúres basqarmasynyń tapsyrmasymen túsirilgen «Tuzdar jáne spaıstar. Qurdymǵa aparar jol» atty beınefılm usynyldy. Onda esirtkige táýeldi bolǵan balanyń anasynyń aıanyshty taǵdyry, dármensizdigi úlken oı tasaıdy.
Polısııa departamenti ázirlegen vedomostvoaralyq baǵdarlama mańyzdylyǵymen, ómirsheńdigimen erekshelendi.
«Osydan úsh jyl buryn óńirde sıntetıkalyq esirtki zattary, tuzdar men spaıstar paıda bolyp, jaýynnan keıingi sańyraýqulaq qusap qaptap barady. Oǵan toqtaý salmasa, adam aǵzasyna zııany óte mol hımııalyq qospalardan turatyny túsindirilmese jastardyń ómirine zor qaýip tóndiredi. Sıntetıkalyq esirtki zattaryna táýeldi jandar bir jyldan artyq ómir súre almaıdy.Byltyr onyń zardabynan 50 soltústikqazaqstandyqtyń kóz jumýy—sózimizdiń dáleli. Olardyń 13-i– kámelettik jasqa tolmaǵan balalar. 263 adamnyń esirtki tutynatyny anyqtaldy. Olardyń 52-i sıntetıkalyq zattarmen áýestenedi. Sıntetıkalyq esirtki satatyn 60-tan astam saıt jabyldy»,deıdi esirtki bıznesine qarsy kúres basqarmasynyń jetekshisi Jandos Basybaev.
«Nadejda NORD» qoǵamdyq-qaıyrymdylyq qorynyń tóraǵasy Evgenıı Zaıanstyń aıtýynsha esirtki zattaryn úzdiksiz qoldaný psıhıkalyq aýytqýlarǵa, mıdyń zaqymdanýyna, qoǵamnan alshaqtap, qylmystyq áreketter jasaýǵa soqtyrady. Jyl ótken saıyn olardyń qatary jasara túsýde.
Jıyn sońynda jastar arnaıy daıyndalǵan fleshmobqa qatysty. «Esirtkisiz bolashaq» ataýy jazylǵan bannerge qoltańbalaryn qaldyrdy.
О́tken jyly úılerdiń qabyrǵalaryna, dýaldarǵa ýly zattardy saýdalaıtyn saıttardy jarnamalaıtyn jazbalardy qaldyrǵan adamdarǵa 75 aılyq eseptik kórsetkish mólsherinde aıyppul salynypty.
Mundaı tanymdyq sharalar aýdandarda da ótkiziletin bolady.
О́mir ESQALI,
«Egemen Qazaqstan»
Soltústik Qazaqstan oblysy