Sybaılas jemqorlyqpen kúres memlekettik saıasattyń basym baǵyttarynyń biri. Alaıda onyń naqty qaǵıdasy joq, degenmen de qoǵamda beleń alyp otyrǵan osyndaı keleńsiz jaǵdaımen kúres árbir azamatqa zor jaýapkershilik júkteıtini sózsiz. Ol memlekettik qyzmetshilerdiń ar-namys qaǵıdalaryn qatań saqtaýymen ǵana shektelmeıdi. Bul baǵyttaǵy jumystardyń barlyǵy qoǵamnyń ashyqtyǵyna jumyldyrýdy qajet etedi. Osy oraıda qala basshylyǵy ótken jyldyń jeltoqsan aıynda «Almaty – adaldyq alańy» jobalyq ofısiniń jumysyn tanystyrǵan-dy.
Memlekettik organdardaǵy jemqorlyqty joıý, qoǵamdyq baqylaýdy iske asyrý, jemqorlyqqa qarsy mádenıetti qalyptastyrý, bılik ınstıtýttaryna degen azamattardyń senimin arttyrý boıynsha jumystardy úılestirý, sondaı-aq jekelegen azamattar men bıznes úshin kedergisiz ári qolaıly jaǵdaı jasaýdy maqsat ete otyryp qurylǵan joba bıylǵy jylǵy jumysyn bastap ketti. Osy oraıda «Azamattarǵa arnalǵan úkimet» memlekettik korporasııasynyń fılıaly, Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty qalasy boıynsha departamenti «Almaty – adaldyq alańy» jobalyq ofısimen birlesip №5 HQO ortalyǵynda arnaıy brıfıng ótkizdi.
«Azamattarǵa arnalǵan úkimet» memlekettik korporasııasy Almaty qalasy boıynsha fılıalynyń dırektory Ǵalym Qarqynbaev sıfrlandyrý jobalary ashyqtyqty qamtamasyz etý, sybaılas jemqorlyqqa aparatyn jaǵdaılardy boldyrmaýmen qatar qyzmet kórsetý sapasyn arttyrýǵa negizdelgenine toqtalyp, azamattardyń elektrondyq qyzmetterdi paıdalaný deńgeıin arttyrý maqsatynda front-ofısterde keń aýqymdy jańartý jumystarynyń júrgizilip jatqandyǵynan habardar etti. Front-ofıstegi jumys aımaǵynyń 60 paıyzynda tıisti qujattardy azamattardyń ózdiginen alý múmkindigi qarastyrylǵan.
Búginde Almaty qalasynda 15 front-ofıs jumys isteıtin bolsa, onyń 5-ýi mamandandyrylǵan qyzmet kórsetý ortalyqtary. Ondaǵy sıfrlyq alańynda 1,588 mln astam azamatqa ózdiginen qyzmet alý tártibi kórsetilip, ótken jyldyń 12 aıynda «Azamattarǵa arnalǵan úkimet» memlekettik korporasııasy Almaty fılıaly kórsetken 3,6 mln. memlekettik qyzmettiń 40 paıyzy elektrondy júıe arqyly júzege asqan. Memlekettik qyzmetter reestrindegi 752 qyzmettiń 621-i, ıaǵnı 81 paıyzy memlekettik korporasııa arqyly qoljetimdi bolsa, onyń 506-yn elektrondy nusqada alýǵa bolady.
Elvıra Serikqyzy,
«Eqemen Qazaqstan»
ALMATY