Almaty oblysynyń mektepterinde zamanǵa saı tehnıkalyq kerek-jaraqpen jabdyqtalǵan IT-synyptar men robot tehnıkasy kabınetterin ashýǵa jergilikti bıýdjetten 220 mln teńge qarjy bólingen. Bul qarjyǵa mektepterde arnaıy synyptar jasaqtalyp, oqýshylardyń sıfrlandyrý baǵdarlamasyna saı bilim alýyna jaǵdaı jasalýda.
Al óńir boıynsha «Sıfrlandyrý baǵdarlamasy» aıasynda atqarylǵan jumystar «Nur Otan» partııasy oblystyq fılıalynyń baqylaýynda.
– «Nur Otan» partııasy aımaqtarda IT-synyp pen IT-ortalyq ashyp, jastardy sıfrly ortaǵa beıimdeý men oqytý jumystaryn nazarǵa alyp otyr. Byltyr Taldyqorǵan qalasyndaǵy agrotehnıkalyq jáne polıtehnıkalyq kolledjderdiń bazasynda eki IT-ortalyq ashylyp, onda yntaly jastar tegin bilim alýdy bastaǵan. Oqýshylar saraıynda da osyndaı ortalyq jumys isteıdi. Jalpy Jetisý jerinde balalarǵa arnalǵan oqý ortalyǵynyń sany kóbeıip, aldaǵy jylda da 62 IT-synyp pen robot tehnıkasyna arnalǵan 19 kabınet ashylady, – deıdi «Nur Otan» partııasy oblystyq fılıaly tóraǵasynyń birinshi orynbasary Ǵalıasqar Sarybaev.
Jalpy biz Jetisý mektepterinde IT-synyp, coworking-ortalyqtar men robot tehnıkasy kabınetteri kóptep ashylyp jatqanyn únemi jazyp kelemiz. Bul baǵyttaǵy sharalar ortalyqtan alysta oryn tepken aýyl mektepterinde júzege asqany qýantady. Mysalǵa, ótkende ǵana Kegen aýdanyndaǵy mektepte coworking-ortalyq ashylǵan edi. Qazir aýyl oqýshylary 3D-modeldeý, anımasııalar jasaý, beınemontajdaý baǵyty boıynsha dáris úırenip, jańa tehnologııalarǵa beıimdelýde. Olar az ýaqyttyń ishinde robot ta qurastyrypty. Negizi Kegen aýdany boıynsha ashylatyn IT-synyptar sany bıyl taǵy kóbeıip, jalpy sany beske jetpekshi.
Dál sondaı jańa úlgidegi IT-synyp jaqynda Ile aýdanynyń Nurǵısa Tilendıev aýylyndaǵy №26 orta mektepte de paıdalanýǵa berildi. Mekteptegi erekshe oryn retinde balalardyń qyzyǵýshylyǵyn oıatqan synypta balalar sıfrly tehnologııa álemine qadam basyp, robot qurastyrýǵa talaptanady. Olar IT-synyptyń ashylýyna kelgen qonaqtarǵa ózderi qurastyrǵan alǵashqy robottaryn da kórsetip úlgerdi.
– Búginde qazirgi zamanǵy IT tehnologııalardy qoldanýmen qatar baǵdarlamalaý negizderin oqytý mektepterde keńinen júrip jatyr. Ásirese, aýyl mektepterine betburys jasap jatyrmyz. Nurǵısa Tilendıev aýylynda ashylǵan IT synypta oqýshylar robottehnıkany tereńdep meńgerip, qarapaıym algorıtmderdi jasaý, baǵdarlamalar men WEB-saıttar, kompıýterlik oıyndar, anımasııalar qurý daǵdylaryn úırený maqsatynda tegin qosymsha sabaqtarǵa qatysa alady, – deıdi Ile aýdandyq bilim bóliminiń basshysy Lázzat Kátkeeva.
Qalmahanbet MUQAMETQALI,
«Egemen Qazaqstan»
Almaty oblysy