Bıatlonnan Qazaqstan jasóspirimder quramasynyń aǵa bapkeri Mıhaıl Dýdchenko álem chempıonatyndaǵy sportshylardyń kórsetkishin saralady. Bul týraly Ulttyq olımpıada komıtetiniń baspasóz qyzmeti habarlady.
Jattyqtyrýshynyń aıtýynsha, ótken jylmen salystyrǵanda bıatlonshylar birshama alǵa basqan.
- Keshe Danıl Beleskııdiń márege altynshy bolyp kelgenin bilesizder. Ol 4 atý alańynan esh qıyndyqsyz ótti. Múmkin, fýnksıonaldyq daıyndyq jetpeı qalǵan shyǵar. Aıaǵy sharshaǵan sııaqty. Alaıda, bul bala álem chempıonatyna alǵash ret qatysyp tur. Sondyqtan, onyń kórsetkishin joǵary baǵalaımyn.
О́tken jylmen salystyrǵanda, komanda músheleri áldeqaıda jaqsy nátıje kórsetýde. Álem chempıonatynyń ekinshi kúni ǵana aıaqtaldy, barlyq básekeler áli alda. Jaqsy nátıje kórsetemiz degen oıdamyn. О́ıtkeni, bizde jaqsy sportshylar joq emes. Eresekter arasyndaǵy synalyp úlgergen Roman Eremın keshe ózin kórsete almady. Al Ahatovanyń márege 15-shi bolyp kelgeni onyń jasóspirimder synyndaǵy úzdik kórsetkishi.
Álem chempıonatyndaǵy qarsylastardyń barlyǵy da azýly. Norvegııa, Fransııa, Germanııa sportshylarynyń shoqtyǵy bıik. Keshe qytaılyq qyzdyń jarysta jeńimpaz atanǵanyn búkil álem kórdi. Búginde Qytaı quramasynda fransııalyq maman jumys isteýde. Olar óz jerinde 2022 jyly ótetin Olımpıada oıyndaryna daıyndyqty áldeqashan bastap ketti. Minekı, aldaǵy maýsymdarda qarsylastarymyzdyń qarqyny óse túspek.
Beleskııge taǵy da jaraısyń degim keledi. Onyń mundaı jarystarǵa birinshi ret qatysqanyn eskersek, nátıje jaman emes.
Búgin estafetashylar jarys jolyna shyǵady. Bizden erler arasynda Baýer, Maksımov jáne Kıreev synǵa túsedi. Qyzdardan Egorova, Shıshıkova jáne Pozdnıakovaǵa senim artamyz.
Elge kelgen soń da bizdi iri dodalar kútip tur. 2002-2003 jyly týǵan sportshylardy Ońtústik Sahalınde ótetin «Azııa balalary» básekesine alyp baramyz. Keıin Shvesııada jasóspirimder arasyndaǵy álem kýboginiń tórtinshi kezeńi ótse, Norvegııada Eýropa chempıonaty bastalady. Osy úsh jarysty abyroımen ótkizip, elge oralý maqsaty tur aldymyzda, - deıdi Mıhaıl Dýdchenko.