Sońǵy kezderi oblys óńirinde ǵalamtor alaıaqtarynan zardap shekkenderdiń Polısııa departamentine bergen aryzy kóbeıe túsken. О́tken jyly ǵalamtor arqyly alaıaqtyq jasaǵan 353 qylmys tirkelgen. Alaıaqtarǵa aldanǵandardyń olarǵa berip qoıǵan aqshasynyń kólemi 2 myń teńgeden 10 mıllıon teńgege deıin barady.
Oblystyq polısııa departamentiniń qyzmetkerleri jergilikti turǵyndarǵa ǵalamtor alaıaqtarynan saq bolýdy eskertti. Mamandardyń aıtýynsha, alaıaqtar adamdarmen ınternet arqyly jazysyp, olardyń senimine kiredi de, shotynda qarjy bar-joǵyna kóz jetkizedi. Sonymen qatar, alaıaqtar qurbandaryn kópshilik jıi paıdalanatyn Kolesa.kz, Krisha.kz, OLX.kz sekildi ınternet alańdarynan ustaıdy. Osy saıttarda kıim, qosalqy avtobólshekter, jyljymaıtyn múlikter , taǵy basqa qajetter satylady. Alaıaqtar adamdarǵa aldyn ala aqshany elektrondyq ámııan, bank shottaryna ekspress-tólem termınaldarynan aýdarýǵa kóndiredi. Olar aqshasy túsken soń joq bolyp ketedi.
Alaıaqtardyń taǵy bir tásili qurbandaryn telefonmen sóılesý, habarlasý arqyly tabady. Olar alatyn taýarlary úshin aqshasyn qurbanynyń bank shotyna aýdarýǵa kóndirip, onyń barlyq bank málimetterin, jeke bas qujattaryn, parolin alyp alady. Alaıaqtar álgi adamnyń atyna joǵary prosentpen nesıeler rásimdeıdi, nemese shotyndaǵy aqshasyn qaqshyp alyp otyrady. Polısııa departamentiniń eskertýinde sońǵy kezderi saıttarda bankterde nashar nesıe tarıhy barlarǵa, ıaǵnı bankterde buryn nesıe qaryzy bolǵandarǵa iri kólemde nesıe alýǵa kómek beretini jóninde jarnamalar qaptap ketkeni, olardan saq bolý jóninde aıtylady. Ǵalamtorda, áleýmettik jelilerge ornalastyrylǵan eshqandaı kúdik týǵyzbaıtyn jalǵan akkaýnttar kóbeıip ketken. Qostanaı oblystyq polısııa departamenti ǵalamtor alaıaqtarynan saq bolý úshin ǵalamtordaǵy habarlandyrýlarǵa ańǵal sene salmaýǵa, basqa paıdalanýshylardyń jazǵan pikirine nazar aýdarýǵa, taýar satýshyny kezdesýge kóndirýge, áleýmettik jelilerde satyp alý-satý kelisimin rásimdemeýge, olarǵa termınal arqyly aqsha aýdarmaýǵa, bank kartochkasy men SMS KOD-tardy eshkimge aıtpaýǵa, tanymaıtyn adamdardyń ótinishi boıynsha bankomattarda qosymsha qyzmetterdi qospaýǵa, eger alaıaqtarǵa aldanyp qalǵanyn bilgen jaǵdaıda tez quqyq qorǵaý organdaryna habarlaýǵa keńes beredi.
Názıra Járimbet,
Egemen Qazaqstan
Qostanaı