Parlament Senaty Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «Táýelsiz Memleketter Dostastyǵyna qatysýshy memleketterdiń terrorızmge jáne ekstremızmniń ózge de zorlyq-zombylyq kórinisterine qarsy kúresti júzege asyratyn quzyretti organdardy materıaldyq-tehnıkalyq qamtamasyz etýdegi yntymaqtastyǵy týraly kelisimdi ratıfıkasııalaý týraly» zań jobasy qaraldy.
Qazaqstan Respýblıkasy, Reseı Federasııasy, Belarýs Respýblıkasy, Qyrǵyz Respýblıkasy, Tájikstan Respýblıkasy, Armenııa Respýblıkasy jáne Moldova Respýblıkasy arasyndaǵy terrorızmge jáne ekstremızmniń ózge de zorlyq-zombylyq kórinisterine qarsy kúresti júzege asyratyn quzyretti organdaryn materıaldyq-tehnıkalyq qamtamasyz etý jónindegi yntymaqtastyq týraly kelisimge 2012 jyly 5 jeltoqsanda Ashǵabat qalasynda qol qoıyldy.
Kelisimniń negizgi maqsaty – terrorızmge jáne ekstremızmniń ózge de zorlyq-zombylyq kórinisterine qarsy kúresti júzege asyratyn quzyretti organdaryn arnaıy tehnıkamen, quraldarmen, materıaldarmen qamtamasyz etý úshin teń jáne jeńildikti jaǵdaı jasaý bolyp otyr.
Kelisim aıasynda taraptar arasyndaǵy yntymaqtastyq quzyretti organdardyń satyp alý jáne jetkizý týraly suraý salýdy oryndaý arqyly júzege asady. Bul rette suraýdy oryndaý merzimi 30 kúnnen aspaýy tıis. Suraý salǵan tarap suraýdyń tolyq, ýaqytynda jáne sapaly túrde oryndalýyna qajetti barlyq sharalardy júzege asyrady.
Kelisimdi júzege asyrýǵa baılanysty shyǵystar quzyretti organdardyń osy maqsatqa arnalǵan qarjysy esebinen júzege asady.
Komıtet otyrysynda sondaı-aq «Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Qazaqstan-Qyrǵyz memlekettik shekarasynyń rejımi týraly kelisimdi ratıfıkasııalaý týraly» zań jobasy qaraldy.
Kelisimge memleketterdiń shekara mekemeleriniń basshylary deńgeıinde 2017 jyly 25 jeltoqsanda Astana qalasynda qol qoıylǵan bolatyn.
Kelisimniń basty maqsaty Qazaqstan Respýblıkasy men Qyrǵyz Respýblıkasy arasyndaǵy memlekettik shekaranyń quqyqtyq negizderin bekitý jáne qatynastardy retteý bolyp tabylady. Memlekettik shekaranyń tártibine shekaradaǵy qoldanylatyn erejeler men memlekettik shekaranyń tártibi, memlekettik shekaradan adamdardy, kólik quraldaryn, júkter men basqa da múlikterdi ótkizý, memlekettik shekara ústinen ushýlar, memlekettik shekarada, shekaralyq beldeýlerde, sondaı-aq shekara sýlary sheginde sharýashylyq jáne ózge de qyzmetterdi júzege asyrý men shekaralyq qaqtyǵystardy sheshý bolyp tabylady.
Kelisim merzimsiz bolyp tabylady. Ony ratıfıkasııalaý Qazaqstan mn Qyrǵyzstannyń memlekettik shekarasyndaǵy tártip erejesin bekitýge, memleketter arasyndaǵy yntymaqtastyqty nyǵaıtýǵa yqpal etedi jáne Qazaqstan Respýblıkasynyń ulttyq qaýipsizdigin qamtamasyz etedi.
Zań jobalary Palatanyń qaraýyna jiberildi.