Qazaqstanda «Stop-kredıt» qyzmeti keńinen tanymal bola bastady. Bul servıs azamattarǵa óz atyna nesıe nemese mıkrokredıt rásimdeýge erikti túrde shekteý qoıýǵa múmkindik beredi. Qarjy naryǵyn retteý jáne damytý agenttiginiń dereginshe, bul qyzmetti 5 mıllıonnan astam adam paıdalanyp úlgergen, dep habarlaıdy Egemen.kz.
«Stop-kredıt» servısi azamattardy alaıaqtyqtan qorǵaýǵa jáne qajetsiz qaryzdardyń aldyn alýǵa baǵyttalǵan. Ony belsendi túrde onlaın satyp alýlar jasaıtyn, marketpleısterdi paıdalanatyn jáne bank kartalaryn qoldanatyn adamdar jıi paıdalanady.
Bul shekteý tek kredıt bıýrolary arqyly tekseriletin uıymdardy qamtıdy. Al lombardtar men nesıe bıýrosyna esep bermeıtin ózge de uıymdarǵa bul shekteý qoldanylmaıdy.
Bank tabysy azaısa, nesıe paıyzy óse me?
Qyzmetti eGov.kz portaly nemese mobıldi qosymsha arqyly ońaı qosýǵa bolady. Qajet bolǵan jaǵdaıda ony kez kelgen ýaqytta alyp tastaýǵa múmkindik bar.
2026 jyldyń 16 naýryzyndaǵy málimet boıynsha, 5,1 mıllıonnan astam azamat bul qyzmetti qosqan. Bul halyqtyń qarjylyq qaýipsizdikke jáne óz nesıe tarıhyn baqylaýǵa degen qyzyǵýshylyǵynyń artqanyn kórsetedi.