Fýtboldan Birikken Arab ámirliginde (BAÁ) ótip jatqan Azııa kýbogynyń aqtyq synyna joldama alǵan qos komanda anyqtaldy. Olar – Japonııa men Katar quramalary.
5 qańtarda bastalǵan dop dodasynda 24 komanda baq synady. Olar alty topqa bólinip, ózara sheberlik baıqasty. Solardyń arasynan 16 eldiń órenderi 1/8 fınalǵa joldama aldy. Ol kezdesýlerdiń nátıjeleri tómendegideı:
Taıland – Qytaı 1:2,
Iran – Oman 2:0,
Iordanııa – Vetnam 1:1 (penaltıden 2:4),
Japonııa – Saýd Arabııasy 1:0,
Ońtústik Koreıa – Bahreın 2:1 (qosymsha ýaqyt),
Katar – Irak 1:0,
BAÁ – Qyrǵyzstan 3:1 (qosymsha ýaqyt),
Avstralııa – О́zbekstan 0:0 (penaltıden 4:2).
Shırek fınalǵa shyqqan komandalar 24-25 qańtar kúnderi jasyl alańǵa shyqty. Sol kezdesýlerdiń úsheýinde 1:0 esebi tirkeldi. Japonııa Vetnamdy, Katar Ońtústik Koreıany jáne BAÁ Avstralııany dál sondaı esepppen utty. Al Iran quramasy Qytaıdyń qaqpasyna jaýapsyz úsh gol saldy – 3:0.
Jartylaı fınalda Japonııa Irannyń tas-talqanyn shyǵardy. Esep – 3:0. Bul básekede Iýıa Osako (bireýi penaltıden) eki gol soqsa, Genkı Haragýtı bir márte mergendik tanytty. Kelesi matchta da iri esep tirkeldi. Katar quramasmy alań ıelerin 4:0 esebimen utty. Bul goldardyń avtorlary – Hýkı Býálem, Álı Almoez, ál-Haıdoz jáne Ismaıl Hamıd.
Japonııa men Katar fýtbolshylary arasyndaǵy fınaldyq saıys 1 aqpanda Ábý-Dabıdegi 50 myń kórermenge eseptelgen «Zaıed Sport Sıtı» stadıonynda ótedi.
Ǵalym SÚLEIMEN,
«Egemen Qazaqstan»