«Qorǵas» shekaralyq baqylaý otrıadynyń aýmaǵynda keshe keshkilik 22 jastaǵy qazaqstandyqtan shekarashylar deklarasııalanbaǵan, jalpy salmaǵy 30 kg-dan asatyn júk (uıaly telefonnyń kerek-jaraqtary, «smart-saǵattar», symsyz qulaqqaptar t.b.) anyqtap, aktimen «Altynkól» keden beketine tapsyrdy. Bul týraly QR UQK ShQ baspasóz qyzmeti habarlady.
Buǵan qosymsha, qorǵastyq shekarashylar keshe taǵy da 22 kg ıesiz qytaı dári-dármegin taýyp, kedenshilerge ótkizdi.
Petropavlovsk shekara otrıadyna qarasty «Qyzyljar-avto» ótkizý bólimshesinde bizdiń elimizden Reseıge qaraı «GAZ 3705» aksızdyq markasyz 550 blok temeki ónimderin alyp bara jatqan 53 jastaǵy qazaqstandyq;
Qordaı shekara otrıadynyń «Qarasý-avto» bólimshesinde «Iveko Deılı» avtokóligimen kórshi elden bizdiń elimizge qaraı 23 000 qorap temekini ruqsat qujattarynsyz ótkizbek bolǵan 51 jastaǵy qazaqstandyq;
Beıneýde «Núkús - Beıneý» baǵytyndaǵy № 647 jolaýshylar poıyzynyń kýpeleriniń birinde, rýndýk astynan 120 shólmek (60 lıtr) araq tabylyp, onyń ıesi – 30 jastaǵy ózbekstandyq azamat ustaldy.
Qostanaı shekara otrıadynyń «Qaırak-avto» bólimshesindev arnaıy úıretilgen qyzmettik ıttiń kómegimen, Reseıge qaraı «Volvo» júk kóligimen ótip bara jatqan 38 jastaǵy qazaqstandyq ustaldy. Onyń qaltasynan shekarashylar salmaǵy 20 grammǵa jýyq sur-jasyl tústi, ósimdik tekti, untaq zat tapty. Iisi men túri gashısh esirtkisine uqsas. Ustalǵan azamat aıǵaq zatymen birge Qarabalyq aýdandyq ishki ister bólimine tapsyryldy.
Saryaǵash shekara otrıadynyń «Jibek joly-avto» bólimshesinde shekarashylar aldyn ala berilgen aqparattar boıynsha, bizdiń elden О́bekstanǵa qaraı eki «Hıýndaı Solıarıs» jáne «Kıa Rıo» avtokólikterimen ótpek bolǵan úsh Tájikstan azamatyn ustady. Olar Reseı Federasııasy aýmaǵyndan urlanǵan avtokólikterdi óz elderine tranzıtpen, Qazaqstan aýmaǵy arqyly alyp ótpek bolǵan eken. Ustalǵandar avtokólikterimen birge Saryaǵash aýdandyq ishki ister bólimine tapsyryldy.