Elbasy Nursultan Nazarbaevtyń tóraǵalyǵymen ótken Úkimettiń keńeıtilgen quramdaǵy májilisinde elimizdiń mashına óndirisine qatysty jaqsy habar aıtyldy. Ulttyq banktiń tóraǵasy Danııar Aqyshevtiń «7-20-25» baǵdarlamasy úlgisimen baǵdarlama ázirlep, Qazaqstan azamattarynyń otandyq kólikti satyp alýyna múmkindik jasaıtyn nesıe beretini týraly málimdemesi bizdi qýantyp tastady.
Mashına qurastyrý isi jolǵa qoıylysymen buryn shıkizat baǵyty basym elimizde óńdeý ónerkásibiniń qadamy ilgeri basa bastady. Osydan on-on bes jyldaı buryn mashına qurastyrý týraly túsinik bolmaǵany ras. Turǵyndar mashına tek shetelden ǵana shyǵady dep oılaıtyn sekildi edi. Elbasynyń bastamasy arqasynda shetelderdegi úzdik brendterdi ózimizde qurastyra bastadyq. Biraq qandaı taýar bolsa da, onyń ótimi durys bolmaı, óndirilýi damyp ketpeıtini, ekonomıkaǵa keri áser beretini sózsiz. Sondyqtan jeńildikpen beriletin avtonesıe men qarjylyq lızıngilerge qol jetkizetin memlekettik baǵdarlamalar jeńil kólik alǵysy keletin turǵyndar men mýnısıpaldyq kásiporyndarǵa mol múmkindik jasady. 2018 jyldyń qorytyndysy boıynsha osy maqsatqa bólingen memlekettik qarjynyń barlyǵy túgel ıgerildi. Qazaqstandyqtarǵa jeńildikpen beriletin kredıt boıynsha baǵdarlama bastalysymen 34 mlrd teńge bólingen bolatyn, sonyń arqasynda 13 000 mashına satyldy. Jeńildikpen berilgen lızıng boıynsha 16 mlrd teńge bólinip, onyń 12,8 mlrd teńgesi ıgerildi, oǵan kommersııalyq 773 kólik satyldy. Mundaı baǵdarlama ózin aqtady dep oılaımyz, qaıtarymdy qarjy negizinde óndiristi ınvestısııalaýdyń tıimdi quralyna aınaldy. Muny táptishtep aıtyp otyrǵanym, bizdiń tutynýshylarymyz otandyq óndiristen shyqqan avtomobılderdi satyp alýǵa daıyn ekenin, mundaı jeńildikter turǵanda syrttan ımporttyq kólikter izdemeıtinin kórsetti. Ekinshi jaǵynan mundaı jeńildikter tehnıkany ýaqytyly, kem degende aıyna 150 birlik kólikti Qazaqstan boıynsha satyp otyrýǵa, sol arqyly otandyq avtoóndiristi damytýǵa yqpal etedi.
Otandyq tutynýshylardyń jeńildik kredıtke suranysy ósip otyr. Ulttyq bank tóraǵasynyń habary óte jaǵymdy jańalyq boldy dep bilemin. О́ıtkeni qazir qazaqstandyqtardyń barlyǵy elimizdiń qalaǵan qalasynan baspana alýǵa qol jetkizip jatqan tıimdi baǵdarlama avtokólik alýǵa da jasalatyn bolsa, odan úsh jaqty tıimdilik bolar edi, ıaǵnı tutynýshy, óndiris, memleket qatar utatyn bolady. Qaıtarymy bar qosymsha qarjylandyrý óndiriske qosymsha jumys ornyn ashýǵa, bıýdjetke túsetin salyq kólemin ulǵaıta túsýge, avtomobıl óndirisin damytyp, onyń naryǵyn keńeıte túsýge múmkindik beredi.
Tutynýshylar qazir Qostanaıdaǵy «SaryarqaAvtoprom» mashına jasaý zaýytynyń ónimin tańdap alatyndaı joǵary deńgeıge jettik. Bul úshin maqtanysh ta rartyq emes. О́tken jyly mashına qurastyrý 13 prosentke artty. Bıyl 25 myń temir tulpardy sapqa qoıamyz dep otyrmyz. О́tken jyldyń sońyna qaraı kelisim jasalǵan Qytaıdyń avtomobıl ımporty jáne eksporty boıynsha memlekettik transulttyq SMS kompanııasy Allıýr kompanııalar tobynyń kapıtalyna kirgeni belgili. 1,1 mlrd dollar ınvestısııa salǵan qytaılyq áriptester otandyq avtoóndirisinde jylyna 80 myń avtomobıl shyǵarýdy josparlap otyr. Elimizdiń bas bankıri aıtqan qýanyshty habar is júzinde de tutynýshylardy qýanyshqa bóleıdi dep oılaımyz.
Erbol SEIPILOV,
«Qazaqstan avtobıznesi qaýymdastyǵy» ZTB tehnıkalyq retteý jónindegi dırektory