Petropavl qalasynda ornalasqan ES 164/3 túzetý mekemesinde jazasyn ótep jatqandardyń 93 prosenti qoǵamdyq paıdaly eńbekke tartylǵan.
Solardyń biri Danııar Rahymov jıhaz jasaýdy jaqsy meńgergen. Ol ózine júktelgen tapsyrmalardy sapaly atqaratyndyqtan, ákimshilik tarapynana alǵan marapattary az emes.
«Biz kóbine mektepter men ýnıversıtettiń zakazdaryn oryndaımyz. Qazir jataqhanalarǵa arnap jatynoryndar, balabaqshalarǵa kıim ilgishter, oqýshylarǵa parta, oryndyqtar ázirlep jatyrmyz» deıdi Danııar. Al Andreı Maıer naýbaıhanada jumys isteıdi. Ol alty áriptesimen birge kúnine 700 bólke nan pisiredi.
Oblys ortalyǵyna irgeles Zarechnyı kentinde jumys isteıtin ES-164/3 túzetý mekemesinde birneshe seh jumys istep tur. Munda tósek jabdyqtaryn da daıyndaıdy. Besaspap sheberler aǵashty jonyp, temirden túıin túıedi.
Kolonııa bastyǵynyń orynbasary Rústem Rahmetovtyń aıtýy boıynsha, munda úsh kásipker óz kásibin dóńgeletip otyr. Isker azamattar jazǵyturym jylyjaı ashyp, kókónis ósirý úshin 160 sharshy metr jer daıyndap qoıypty.
Búginde 140 sottalýshy jumyspen qamtamasyz etilgen. Aılyq tabystary arnaıy jeke esepshotqa aýdarylady. Jalaqynyń jartysyn ózderine qaldyryp, qalǵan qarajatty bereshekterin óteýge, bolmasa týǵan-týystaryna, otbasylaryna aýdarýǵa quqyly.
О́mir ESQALI,
«Egemen Qazaqstan»
Soltústik Qazaqstan oblysy