Shymkenttegi Qazaqstan halqy Assambleıasy ǵımaratynda «U:projects» qoǵamdyq birlestigi jáne «Shymkent» áleýmettik-kásipkerlik korporasııasynyń uıymdastyrýymen «U:hack» ınnovasııalyq ıdeıalar festıvali ótti. Jastar jyly aıasynda bastaý alǵan sharaǵa Reseı, О́zbekstan, Qyrǵyzstan jáne elimizden jalpy sany 700-den astam adam qatysty.
Eki kúnge jalǵasqan festıvalde aıtı, kontent pen medıa, kıno jáne vıdeo, kásipkerlik taqyrybynda seksııalar uıymdastyrylyp, spıkerler arnaıy trenıng ótkizdi.
«U:hack» ınnovasııalyq ıdeıalar festıvalinde ár seksııada óte ózekti máseleler qozǵalyp, jastar tálimgerlerdi tapjylmaı tyńdady. Ásirese, kontent jáne medıa, kásipkerlik bólimderine qyzyǵýshylyq tanytqan jastardyń qarasy qalyń boldy. Dáris barysynda kásip bastaý men medıa salalaryn damytý boıynsha elimizge belgili medıa-maman, bloger Álısher Elikbaev WOWtayotacamry70 jobasyn mysalyǵa ala otyryp, jastarǵa qalaı qyzyqty mátin jazýǵa bolatynyn aıtty. Záýre Rozmat «The steppe» jastar portalynyń jetekshisi retinde búgingi onlaın jýrnaldar týraly keńinen áńgimeledi. Al, «Davaı shodım» saıtynyń mamany Jánerke Baýbekqyzy smm jáne kopıraıtertıng jaıynda tolyqqandy maǵlumat berdi. Jas bıznesmen Farhat Ábdiqadyr bolashaq kásipkerlerge qalaı bıznes júrgizý kerek ekenine toqtalyp ótti. Suraq jaýapqa jalǵasqan kezdesý sońynda tyńdaýshylar spıkerlermen ózara pikir almasty.
Sondaı-aq, Shymkentte ótken «U:hack» ınnovasııalyq ıdeıalar festıvalinde qalalyq N65 mekteptiń oqýshylarynan quralǵan INO komandasy qazaqsha sóıleıtin robot tanystyrdy. Mobıldi qosymshamen basqarylatyn servıstik robot ózdiginen qozǵalyp, qazaqsha qoıylǵan suraqtarǵa jaýap bere alady. Joba avtory Eldos Turannyń aıtýynsha, bul robot qurastyrýǵa 1 apta ýaqyt jumsaǵan. Ony Ino.Lab ınnovasııalyq zerthanasynda jasap shyqqan. Jas ónertapqyshtar búginde atalǵan zerthanada aqparattyq tehnologııalardy meńgerip júr. Olar bolashaqta jasandy ıntellektpen jumys isteıtin osyndaı robottardy kóptep jasamaq.
Osylaısha bir jetide qultemirdi qazaqsha «saıratqan» jasóspirimderdiń eńbegin elge ktanystyrǵan festıval máresine jetti. 48 saǵattyq básekede úzdik shyqqan joba avtorlary anyqtalyp, jas jeńimpazdardy Shymkent qalasynyń ákimi Ǵabıdolla Ábdirahymov marapattady.
Is-sharaǵa qatysqan shahar basshysy alǵash ret uıymdastyrylyp otyrǵan baıqaýǵa oń baǵasyn berip, qalanyń jalyndy jastaryna sáttilik tiledi.
«Respýblıkalyq mańyzy bar qalada barlyq jaǵynan básekege saı bolýy kerek. Búgingi baıqaýǵa elimizdiń úzdik jastary qatysyp otyrǵanyna senimdimin. Biz jastarǵa qoldaý kórsetýge árqashan daıynbyz. Bıyl Jastar jyly aıasynda aýqymdy jobalar júzege asyrylady», - dedi Ǵabıdolla Rahmatollauly.
Sonymen IT bólimine usynylǵan 50 jumystan úzdik úsh joba irikteldi. Nátıjesinde birinshi oryndy aqyldy arba oılap tapqan «Jastar-INOLAB» komandasy, ekinshi oryndy «Solvet team» toby, al, aqyldy jylyjaı jobasyn usynǵan «Creat IT» úshinshi oryndy ıelendi.
Kontent jáne medıa seksııasynda 30 joba ishinen bilim berý salasyn damytýǵa baǵyttalǵan «Doge komek» komandasynyń jumysy úzdik dep tanyldy. Ekinshi oryn «Speak Up» tobyna, al úshinshi oryn zamanaýı graffıt beıneleý ónerin qolǵa alǵan «Steet art» qyzdar komandasyna buıyrdy.
Kásipkerlik bóliminde 74 joba ádil qazylardyń nazaryna usynyldy. Sabyn óndirý bıznesin qorǵaǵan «Tean dream» toby birinshi oryndy jeńip alsa, ulttyq naqyshtaǵy zergerlik buıymdar ortalyqtaryn jandandyrýǵa nıetti «Shashbaý» komandasy ekinshi orynǵa ıe boldy. Al, jastar arasyndaǵy ajyrasý indetin emdeýdiń ońtaıly jolyn usynǵan tarazdyq «Kelin Master» komandasy úshtikti qortyndylady.
Kıno jáne vıdeo seksııasyna 50 áleýmettik rolık kelip túsken. Alǵashqy ornynan «Cross crew» komandasy kórinse, «Hucking perfect» toby ekinshi, elordalyq komanda úshinshi oryndy enshiledi.
Bul retki ozyq ıdeıalar baıqaýynyń ereksheligi óte qysqa ýaqyt ishinde oıda júrgen dúnıelerdi jobaǵa aınaldyryp, ony damytýǵa qarjylaı qoldaý alýǵa múmkindik berip otyr. Osy rette joba jeńimpazdary men úzdik ınnovasııalyq jumystar usynǵan 3 komandaǵa júlde qory 2 mıllıon teńgeni quraıtyn aqshalaı syılyq tabystaldy.
Uıymdastyrýshylardyń aıtýynsha, jylyna eki ret ótkizý josparlanǵan festıval kez kelgen jastyń kreatıvti ıdeıasyn joba prototıpine aınaldyratyn jastar alańyna aınalmaq. Atalǵan alańda eń úzdik áleýmettik jobalarǵa basa nazar aýdarylyp, bastamashyl jastardyń tyń usynystaryna qoldaý kórsetiletin bolady.
Nurshat TО́KEN,
«Egemen Qazaqstan»
Shymkent