Ádildikti uran qylyp, naıza men qalamdy qatar ustaǵan jalyndy aqyn, erjúrek batyr Mahambettiń murasy – eldiktiń, erliktiń óshpes rýhy. Memleket basshysynyń «Bolashaqqa baǵdar: rýhanı jańǵyrý», «Uly dalanyń jeti qyry» maqalalary aıasynda aqynnyń týǵan jeri Atyraýda taǵylymdy shara ótti.
Mahambet atyndaǵy akademııalyq qazaq drama teatrynyń ártisteri aqynnyń aıbalta jyrlaryn naqyshyna keltirip oqysa, «Naryn» halyq aspaptar orkestri kúılerin kúmbirletti. Eń basty jańalyq – aqyn murasyn qasterlep, nasıhattaý isine úles qosyp júrgen óner qaıratkerlerine Mahambet atyndaǵy respýblıkalyq syılyq tabystaldy.
Oblys ákiminiń orynbasary Álibek Náýtıev sońǵy ret bul syılyq 2003 jyly IýNESKO sheńberinde toılanǵan Mahambet О́temisulynyń 200 jyldyǵyna oraı berilgenin atap ótti. Odan bergi ýaqytta da Mahambet qubylysyna boılap, tereńnen oı qozǵaǵan týyndylar jaryq kórdi. Syılyq taǵaıyndaý jónindegi komıssııa sheshimimen kórkem jáne derekti fılmder arasynan «Mahambet» tolyq metrajdy kórkem fılmi úshin aqyn, qoǵam qaıratkeri, Qazaqstannyń halyq jazýshysy, Memlekettik syılyqtardyń laýreaty, Qazaqstannyń Eńbek Eri Oljas Súleımenov, fılm rejısseri, Qazaqstannyń eńbek sińirgen qaıratkeri Slambek Táýekel, basty rólde oınaǵan tanymal akter, Qazaqstannyń eńbek sińirgen qaıratkeri Berik Aıtjanov marapattaldy. «Mingeni Isataıdyń Aqtaban-aı!» atty derekti fılmi úshin rejısser Amangeldi Tájibaev, «Mahambet» derekti fılmi úshin rejısser Jańabek Jetirýov syılyqqa laıyq dep tanyldy.
«Saz» atalymy boıynsha halyq ártisi Ǵafız Esimov, kúıshi-dombyrashy, Qazaqstannyń eńbek sińirgen ártisi Aıgúl Úlkenbaeva, Ǵ.Qurmanǵalıev atyndaǵy oblystyq fılarmonııanyń Dáýletkereı atyndaǵy qazaq halyq aspaptary orkestriniń dırıjeri, «Daryn» memlekettik jastar syılyǵynyń ıegeri Erkin Nurymbetov, Qazaqstannyń eńbek sińirgen qaıratkeri, "Parasat" ordeniniń ıegeri, Atyraý oblysynyń qurmetti azamaty Aıtqalı Jaıymov «Mahambet syılyǵyna» ıe boldy. «Sáýlet» atalymynda Atyraý qalasyndaǵy «Isataı-Mahambet» eskertkishter keshenin salǵany úshin halyqaralyq sáýlet akademııasynyń akademıgi, QR Eńbek sińirgen qaıratkeri, professor Samatbek Bókebaı, «Eren eńbegi» úshin medaliniń ıegeri, arhıtektor Baqtybaı Taıtalıev marapattaldy. «Proza» atalymynda «Isataı-Mahambet kóterilisi» jáne «Mahambet» atty kórkem týyndysy úshin jazýshy, memlekettik syılyqtyń ıegeri Ánes Saraı, jazýshy,memlekettik syılyqtyń ıegeri Qajyǵalı Muhanbetqalıev, «Mahambet kitaphanasy» serııasymen 20 tomdyq kitapty jáne «Mahambet eli» atty kitap-albomyn úsh tilde daıyndaýda jalpy redaksııasyn basqarǵan, Prezıdent syılyǵynyń laýreaty Mereke Qulkenov, «Mahambet» atty fılosofııalyq tolǵaý kitaby úshin jazýshy, «Daryn» memlekettik jastar syılyǵynyń, Táýelsiz «Tarlan» syılyǵynyń laýreaty Dıdar Amantaıǵa respýblıkalyq «Mahambet syılyǵy» tabys etildi.
«Mahambet» atty grafıkalyq sýretter toptamasy úshin sýretshi Tilek Halın, ǵylymı-zertteý eńbekteri úshin Qazaqstan Jýrnalıster Odaǵy syılyǵynyń ıegeri Tilekqabyl Boranǵalıuly, professor Karıma Saharbaeva, Eýrazııa ýnıversıtetiniń dosenti, belgili ǵalym, aqyn Ońaıgúl Turjan, H.Dosmuhamedov atyndaǵy Atyraý memlekettik ýnıversıtetiniń professory, akademık Amangeldi Shamǵonovtar da atalǵan syılyqqa laıyq dep tanyldy.
«Poezııa» otanshyldyqqa, batyrlyq rýhqa, ulttyq patrıotızmge arnalǵan kórkem shyǵarmalary úshin aqyn, memlekettik syılyqtyń laýreaty, Jazýshylar Odaǵy Basqarma tóraǵasy Ulyqbek Esdáýlet, memlekettik syılyq laýreaty Aqushtap Baqtygereeva, respýblıkalyq «Juldyz» jýrnalynyń bas redaktory Ǵalym Jaılybaı, T.Aıbergenov atyndaǵy syılyqtyń laýreaty Svetqalı Nurjan, halyqaralyq «Alash» ádebı syılyǵynyń ıegeri Járken Bódesh, Sheshenstan memlekettik syılyǵynyń laýreaty, «Mahambet maıdany» óleńder kitabynyń avtory Rafael Nııazbekov, halyqaralyq «Shabyt» festıvaliniń laýreaty, «Farıza juldyzdary» jas aqyndar klýbynyń jetekshisi Álııa Daýletbaeva «Mahambet syılyǵymen» marapattaldy. «Nasıhat» atalymy boıynsha Mahambet shyǵarmashylyǵyn nasıhattaýdaǵy uıymdastyrýshylyq eńbegi úshin Mahambet atyndaǵy akademııalyq qazaq drama teatrynyń dırektory Berik Jámenov, ardager ustaz, Bilim berý isiniń úzdigi Atalyq Beısen syılyq ıegerleri atandy.
- Ábish Kekilbaev Mahambet týraly jazǵan «Shandoz» atty eńbeginde onyń «tabıǵattan qalaǵan ýaqytynda tabyla bermeıtin asyldaı asa sırek kezdesetin qubylys» ekendigin aıta kelip: «Ondaı qubylys tek qazaq túgil, barsha adamzattyń ǵumyrynda da kóp kezdese bermegen», - dep jazǵan edi. Al ondaı tulǵany zerttep bolýǵa bir ǵasyr qaıdan jetsin! Aǵylshyndar osydan tórt jarym ǵasyr burynǵy Shekspırdi áli zerttep bitken joqpyz deıdi. Shekspır týraly kúlli álemniń ǵalymdary 10 myńnan astam zertteý jasapty. Biz zertteýler aýqymyna osyndaı deńgeıdegi salystyrýlar arqyly qaraýymyz kerek,-deıdi mahambettanýshy ǵalym, aqyn Ońaıgúl Turjan. Aldaspan aqyn armandap ketken azattyq tańynda eldikti jyr etken áli talaı týyndy jazylary anyq.
Baqytgúl BABASh,
«Egemen Qazaqstan»
ATYRAÝ