Oral qalasynda turmystyq qatty qaldyqtardy óńdeý kesheni iske qosyldy. Bul fın ınvestorlarymen arada júrgizilgen birneshe jyldyq áriptestiktiń jemisi. «Jasyl ekonomıka» aıasynda qyzmetin bastaǵan kásiporynnyń ashylýyna óńir basshysy Altaı Kólginov keldi.
Fın ınvestorlarynyń bastamasymen iske qosylǵan óńirdegi tuńǵysh keshen jylyna 100 myń tonna qatty qaldyqty óńdeı alady. Bul jóninde sharaǵa qatysqan fınlıandııalyq «ICM Recycling Creen Service Company» kompanııasynyń quryltaıshysy Kalver Kapper men «Finnish Business Hub» ortalyǵynyń dırektory Muhtar Mánkeev aıtyp berdi.
Bir qyzyǵy, Oraldaǵy osy jobanyń alǵashqy «kirpishi» Astanadaǵy «EKSPO-2017» kórmesinde qalanǵan. Dálirek aıtsaq, Batys Qazaqstan oblysy basshylary men fın kásipkerleriniń tanystyǵy sol kezden bastalypty. Ekijaqty kelissózder nátıjesinde paıda bolǵan bul keshendi kóterýge 400 mln teńge jeke qarjy quıylǵan. Ázirge munda 45 adam qyzmet etip jatyr. Jaqyn arada óńdeý kesheniniń qyzmetkerleri 100 adamǵa jetpek.
- Osy mańyzdy jobany iske qosýǵa eki jyl eńbek ketti. Áýeli «EKSPO-2017» kórmesinde qatty qaldyqtardy óńdeıtin fındik kompanııanyń jumysymen tanystyq. Kóp uzamaı Fınlıandııa eline arnaıy bardyq. Ol el kóń-qoqysty osydan 20 jyl buryn óńdeı bastaǵan eken. Qazir kóp tájirıbe jınady. Búginde Astana jáne Almaty qalalarynda da osyndaı kásiporyn salynyp jatyr. Fınlıandııa kompanııalarymen aradaǵy kelisim boıynsha ınvestor 400 mln. teńge qarajatyn osy kásiporynnyń qurylysyna jumsady. Mine, búgin qatty turmystyq qaldyqtardy suryptaıtyn keshen iske qosyldy. Bizdiń usynysymyzdy qoldaǵan fındik kompanııa ókilderine jáne Fın bıznes habynyń dırektory Muhtar Mankeevke alǵys aıtamyz, - dedi óńir basshysy Altaı Kólginov.
- Fınlıandııada turmystyq qatty qaldyqtyń 99 paıyzy qaıta óńdeledi. Qazaqstandaǵy bul kórsetkish ázirge 11 paıyzdy ǵana quraıdy eken. Biz búgin iske qosyp otyrǵan keshen Oraldaǵy óńdeletin qaldyq kólemin 23 paıyzǵa jetkizýi tıis. Áýelgi josparymyzda biz bul jerden bıogaz óndirýdi de kózdegen edik. Biraq munda órttiń jıi bolýy gaz óndirýge múmkindik bermeı otyr. Sondyqtan keshende suryptalǵan qaldyqtyń jaramsyz bóligin arnaıy jerge jınap, aldaǵy 3-4 jyldan bastap bıogaz óndire bastaımyz, - deıdi osy jobanyń quryltaıshysy Kalver Kapper.
Endi qala bıliginiń aldynda turǵyndardy turmystyq qaldyqty suryptap jınaýǵa úıretý máselesi tur. Kóp keshikpeı Oral kóshelerinde arnaıy qoqysty suryptap salatyn túrli jáshikter paıda bolmaq. Sondaı-aq balabaqshalar men mektepterden bastap qoqysty saýatty suryptaý baǵytynda arnaıy sabaq júrgizý josparlanǵan.
О́ńir basshysy bolashaqta osyndaı keshenderdi aýdan ortalyqtarynda da ashý jospary bar ekenin aıtady. «Bolashaqta kúl-qoqysty kádege jaratyp, qajetti zattar shyǵarýǵa, sondaı-aq bıogaz óndiretin jaǵdaıǵa da qol jetkizetin bolamyz» deıdi Altaı Kólginov.
Qazbek QUTTYMURATULY,
«Egemen Qazaqstan»
Batys Qazaqstan