Búgin Qaraǵandy oblysyndaǵy Dolınka eldi mekeninde oryn tepken №6505 áskerı bólimine qarasty ekinshi atqyshtar batalonynyń sarbazy Álibı Sapanyń máıiti qaraýyl munarasynan tabyldy. Aldyn ala jasalǵan boljamǵa sensek, qatardaǵy jaýynger ózin-ózi Kalashnıkov avtomatynan atqan.
Alaıda, 18 jastaǵy Álibıdiń et jaqyndary mundaı aqparatqa senimsizdik tanytyp otyr. Mysaly, marqumnyń anasy Maıgúl Álipbaeva bul oqıǵa shyndyǵynyń búrkemelenip otyrǵanyn aıtady.
– О́tken senbi kúni ǵana telefon soqty. О́te kóńildi bolatyn, jaıdary daýyspen óziniń hal-jaǵdaıynyń jaqsy ekenin aıtty. О́zine qol saldy degenderge senbeımin. Balam áskerge óz erkimen ketken bolatyn. Kinálilerdi taýyp, jazasyn bersin, – deıdi aıdyń kúnniń amanynda balasynan aıyrylyp qalǵan ana.
Álibı Sapa ásker qataryna Almaty oblysynan shaqyrylǵan eken. Komandırleri men qarýlastarynyń aıtýynsha, ol únemi jaıdary júretin, peıili aq jigit bolǵan. Al endi osyndaı qaıǵyly jaǵdaıǵa ákelgen sebepti eshkim tap basyp aıta almaı otyr. Sarbazdyń áskerı qyzmettiń aýyrtpashylyǵy jaıly nemese qarýlastarymen arada qandaı da bir kıkiljińniń bolǵany týraly jan balasyna shaǵymdanǵan jeri joq eken. Tipti, ol ájesine jazǵan hatynda áskerı ómirdiń ózine unaıtynyn, osynda kelisim shart boıynsha qalýdy nemese boryshyn ótegennen keıin oqýǵa túsý jaıyn oılastyryp júrgenin aıtqan.
Álibı Sapanyń óli denesi ózi turǵan №9 posttaǵy qaraýyl munarasynan tańǵy saǵat 7-den 40 mınýt ótkende tabylǵan. Sarbazdyń mindeti – eńbekpen túzeý mekemesinde jazasyn ótep júrgender jumys isteıtin óndiristik nysandardy kúzetý bolǵan eken.
Atalǵan áskerı bólimniń basshylary bul tótenshe oqıǵaǵa «sýısıd bolýy yqtımal» degen baǵa berip otyr. Máselen, №6505 áskerı bólim komandıriniń mindetin atqarýshy Azamat Smaǵulov bylaı deıdi:
– Qatardaǵy jaýynger Sapa kúzet ornynda ózine avtomat Kalashnıkovten oq atyp, ıeginiń astynan jaralap, sýısıd jasady degen joramal bar. Sarbaz kúzet ornynda áskerı qyzmetin atqarý kezinde jalǵyz bolǵan. Ol Almaty oblystyq qorǵanys isteri jónindegi departamentten kelgennen bergi ýaqyt ishinde belgilengen tártip boıynsha arnaıy daıarlyqtan, oqý beketine beıimdelý kezeńinen ótken.
Jalpy, №6505 áskerı bólimde mundaı tótenshe oqıǵanyń bolyp otyrǵany jalǵyz bul ǵana emes. Máselen, osydan bes jyl buryn 19 jastaǵy sarbaz Myrzabaı Saparbaev ta qaraýyl munarasynda atylyp ólgen bolatyn.
Ulttyq ulannyń qyrshynynan qıylǵan sarbazy Álibı Sapanyń múrdesi týǵandaryna tapsyrylady. Al olar bolsa, tergeý-tekserý amaldarynyń ádiletti túrde júrgizilýin talap etip otyr.
Tótenshe oqıǵa ózine-ózi qol salý ma álde áskerı boryshyn óteýshi ózin baıqamaı atyp aldy ma, munyń barlyǵynyń aq-qarasyn áskerı-tergeý basqarmasynyń tergeý-jedel toby anyqtaıtyn bolady.
Qaırat ÁBILDA,
«Egemen Qazaqstan»
Qaraǵandy oblysy