Senat otyrysynda depýtat Álimjan Qurtaev Premer-Mınıstr B.Saǵyntaevtyń atyna depýtattyq saýal joldady.
«2020 jyly Uly Dalanyń uly tulǵasy, ultymyzdyń maqtanyshy - Ábý Nasyr ál-Farabı babamyzdyń 1150 jyldyq mereıtoıy toılanady. Osyǵan oraı, Mádenıet jáne sport mınıstrligi aıryqsha datany IýNESKO deńgeıinde toılaýǵa áreket etýde. О́tetin is-sharalardyń tizimi jasalyp, tııanaqty daıyndyq júrgizilip jatyr. Árıne, bul óte quptarlyq jaǵdaı. Buǵan qosa, keıinge qaldyrýǵa bolmaıtyn birneshe mańyzdy máselelerdi sheshýimiz qajet», delingen depýtattyq saýalda.
Budan ári Álimjan Qurtaev Sırııadaǵy soǵystyń toqtaýyna baılanysty jáne 1150 jyldyqtyń qarsańynda, ıaǵnı, 2019 jyly ál-Farabı atyndaǵy mavzoleıdiń qurylysyn tolyqtaı aıaqtaý kerek ekenin aıtady.
«2006 jylǵy Sırııaǵa barǵan saparymyzda ál-Farabı babamyzdyń mavzoleıiniń kóshirmesin ákeldik. Búgingi kúni sol kóshirmeniń úlgisimen mavzoleıdi salý kezek kúttirmeıtin ıgilikti istiń biri bolýy tıis. Mundaı qadam Otyrar-Túrkistan óńirinde mádenı týrızmdi damytýǵa úlken serpin bereri sózsiz», delingen depýtattyń saýalynda.
Sondaı-aq depýtat Ál-Farabıdiń eńbekterin aýdarýdy usyndy.
«Búgingi kúnge deıin bizge 100-den astam shyǵarmalary málim. Alaıda olardyń bar-joǵy 20 shaqtysy ǵana qazaq jáne orys tilderine aýdarylǵan. Olaı bolsa, qalǵan eńbekterin aýdarý isin qolǵa alýymyz kerek. Mysaly, Sırııa saparynan ákelingen «Eki uly ımamnyń tápsiri», «Ál-Farabıdiń logıkasy», «Ál-Farabıdiń ǵylym jáne tárbıe týraly eńbekterine taldaý», «Ál-Farabı», «Ál-Farabı jáne izgi qalalar», «Ál-Farabıdiń fılosofııalyq kózqaras týraly», «Ál-Farabı men Ál-Kındıdiń termınologııalyq ensıklopedııasy» jáne áz-Zahır Beıbarys sultan týraly «Teńiz mámlúkteri» atty týyndylar qazaq jáne aǵylshyn tilderine aýdarylyp, ultymyzdyń jáne álemniń oqyrmandarynyń ortaq qazynasyna aınalsa nur ústine nur bolar edi» delingen Á.Qurtaevtyń depýtattyq saýalynda.
Budan ári ol ǵulamanyń ómir tarıhy men shyǵarmashylyǵyn tutas sıpattaıtyn «Ál-Farabı ensıklopedııasyn» daıyndaýdy, babamyzdyń ómirinen derekti fılm túsirýdi, Astana men Túrkistan qalalarynda ál-Farabı eskertkishin ornatýǵa barynsha qoldaý kórsetý kerek ekenin sóz etti.