Almaty ákimi Baýyrjan Baıbek Germanııa Federatıvtik Respýblıkasy jáne Grek Respýblıkasy elshilerimen ekijaqty kezdesýler ótkizdi. Taraptar saýda-ekonomıkalyq jáne mádenı-gýmanıtarlyq baılanystardy nyǵaıtý, bolashaqta týrızmdi damytý, ınnovasııa salasynda tájirıbe almasý máselelerin talqylady. Bul týraly Almaty ákimdiginiń baspasóz qyzmeti habarlady.
Álemdik ekonomıkadaǵy daǵdarysqa qarmastan GFR men Almaty arasyndaǵy taýar aınalymy ótken jyldyń 9 aıy ishinde burnaǵy jyldyń osy kezeńimen salystyrǵanda 45%-ǵa ósti. Qalada germandyq kapıtalmen 254 kompanııa jumys isteıdi.
Elektroavtobýstardyń úshinshi býynyn shyǵaratyn qazaqstandyq-germandyq-gonkongtik «Falcon Eurabus» zaýyty ózara yntymaqtastyqtyń jemisi bolyp tabylady ári onyń óńirde alǵashqy 300 oryndy avtoparki bar.
GFR elshisi Tılo Klınner jyl saıyn ótetin «Qazaqstandaǵy German ekonomıkasynyń kúnderi» bıznes-forýmynyń iskerlik baılanysty nyǵaıtýǵa oń yqpal etetinin erekshe atady. Qazaqstan-Nemis ýnıversıtetiniń, DAAD akademııalyq almasý jónindegi Nemis qyzmetiniń jáne TMD elderindegi jalǵyz nemis drama teatrynyń arqasynda mádenı jáne bilimı tájirıbe almasý damýda.
О́z kezeginde Qazaqstandaǵy Gresııanyń elshilik mıssııasynyń basshysy Aleksandros Katranıs Almaty óńir úshin barynsha tartymdy týrıstik destınasııa ekenin aıtty. Qalalardy tehnologııalyq jaǵynan damytý úshin ózara tájirıbe almasý bolashaqtaǵy mańyzdy is bolatyny atap ótildi.