Qurylys salasyndaǵy kásipkerlerdiń zańdy jáne jeke tulǵalarynyń basyn biriktiretin «Qurylysshylar qaýymdastyǵyn «BK-Stroı» JShS dırektory Igor Kım basqaratyn boldy.
Oblystyq kásipkerler palatasynda ótken qaýymdastyqtyń alǵashqy otyrysyna qatysýshylar bir aýyzdan osylaı sheshti.
«Biz búgin beker jınalyp otyrǵan joqpyz. Men Ksáipkerler palatasynyń óńirlik keńesiniń ókilimin jáne kóp jylǵy óz tájirıbemnen aıtaıyn, «Atameken» kásipkerlerdiń problemalaryn tıimdi ári naqty sheshedi. Qazir ózekti másele kimde joq, bárimizde bar. Biraq ony árkimniń óz betinshe sheshýi qıyn. Sondyqtan biz Qurylysshylar qaýymdastyǵyn quryp otyrmyz. Bul uıymǵa tek qurylysshylar ǵana emes, qurylys materıaldaryn óndirýshiler, jobalaýshylar, tehnıkalyq baqylaýshylar, qysqasy, qurylysqa qatysy barlardyń barlyǵy da kiretin bolady» dedi Igor Romanovıch.
Alǵashqy otyrysta-aq qaýymdastyqqa 19 kásiporyn kirýge tilek bildirdi. Birlestik qurylysshylardyń ózekti máselelerin aldymen jınaqtap, ony kásipkerler palatasynyń kómegimen sheshetin bolady.
«Salalyq qaýymdastyqty qurý bıznesti jandandyrýǵa jáne kóptegen máseleler boıynsha jıyntyq pikir týǵyzýǵa yqpal etedi. Mysaly, oblysta týrıstik jáne meımanhana bıznesiniń qaýymdastyǵy jumys isteıdi. Qurylys salasy qazir belsendi, tez damyp otyr, ol kóptegen máselelerdi sheshýdi talap etedi. Biz olardy Úkimet deńgeıinde qaraıtyn bolamyz» deıdi Oblystyq kásipkerler palatasynyń dırektory Murat Ábenov.
Názıra Járimbet,
«Egemen Qazaqstan»
Qostanaı