Joǵary oqý oryndarynda sybaılas jemqorlyqtyń profılaktıkasy men eskertý máseleleri biraz jyldan beri kóterilip keledi. Bilim ordalaryndaǵy oqý baǵdarlamalary sheńberinde sybaılas jemqorlyqsyz mádenıet qalyptastyrýdyń álipbıin oqytý 2015 jyldan bastalǵan bolatyn.
Sol kezde Qazaqstan bilim jáne ǵylym mınıstri bilim mazmunyn jańartý jaǵdaıynda balalar men oqýshy jastardyń tárbıesindegi ıdeologııa men strategııasyn anyqtaýdy maqsat etken «Tárbıeniń tujyrymdyq negizderin» bekitken edi. Osy qujatta adamı jáne ulttyq qundylyqtarǵa, patrıottyq tárbıege, eńbekke jáne adam quqy men erkindigine basymdyq berildi.
Búgingi jastar osy tárbıe baǵyty men bilim údesinen qanshalyqty shyǵyp otyrǵanyn anyqtaý úshin QR Memlekettik qyzmet jáne sybaılas jemqorlyqqa qarsy is-qımyl agenttiginiń oblys boıynsha departamenti «Sanaly urpaq» front-ofısimen birlese otyryp, elimizde birinshi ret sybaılas jemqorlyqqa qarsy olımpıada ótkizdi. Bul bastamany oblys óńirindegi barlyq joǵary oqý oryndary men qoǵamdyq uıymdar qoldady. Olımpıadaǵa oblys óńirindegi barlyq joǵary oqý oryndarynan 50 stýdent qatysty.
Olımpıadaǵa qatysýshylar sybaılas jemqorlyqqa qarsy is-qımyldy retteıtin elimizdiń jáne halyqaralyq zańnamalarynan bilimin tekserý úshin birneshe suraqtarǵa jaýap berýi tıis boldy. Taqyryptardyń biri stýdentterden memlekettik qyzmet salasyndaǵy reforma ózektiligine qatysty esse jazýdy talap etti. Departament bastyǵynyń orynbasary Erlan Salyqbaevtyń aıtýynsha, búginde sybaılas jemqorlyqqa tózbeý ómirdiń barlyq salasyn qamtıdy. Bul baǵyttaǵy aqparattar men zańnamalar talabyn qoǵamnyń ár azamatyna jetkizetin tabysty saıasat ulttyń turaqty damýyna kepildik beredi.
Olımpıada qorytyndysy boıynsha A.Baıtursynov atyndaǵy Qostanaı memlekettik ýnıversıtetiniń stýdenti Aıym Berkenova birinshi oryndy, Z.Aldamjar atyndaǵy Qostanaı áleýmettik-tehnıkalyq ýnıversıtetiniń stýdenti Kámıla Ábildınova ekinshi, IIM Sh.Qabylbaev atyndaǵy Qostanaı akademııasynyń tyńdaýshysy Áset Naýryzbaev úshinshi oryndy jeńip aldy.
Názıra Járimbet,
«Egemen Qazaqstan»
Qostanaı