Bıylǵy 27 aqpanda Astanada Qazaqstan Respýblıkasynyń Prezıdenti, partııa Tóraǵasy Nursultan Nazarbaevtyń qatysýymen «Nur Otan» partııasynyń kezekti XVIII sezi ótedi. Sezde «Ál-aýqatty qoǵam: onjyldyqtyń 10 maqsaty» atty partııanyń 2030 jylǵa deıingi jańa baǵdarlamasy qabyldanady dep kútilýde. Osyǵan baılanysty «Nur Otan» partııasy Saıası keńesiniń múshesi, M.H.Dýlatı atyndaǵy Taraz memlekettik ýnıversıtetiniń rektory Mahmetǵalı Sarybekovpen suhbattasqan edik...
− Mahmetǵalı Nurǵalıuly, «Nur Otan» partııasynyń 2030 jylǵa deıingi jańa baǵdarlamasy nelikten qajet boldy dep oılaısyz?
− 2016 jyly 29 qańtarda «Nur Otan» partııasynyń XVII sezinde «Qazaqstan-2021: Birlik. Turaqtylyq. Jasampazdyq» atty saılaýaldy baǵdarlamasy qabyldanǵan. О́tken 3 jyldyń ishinde qazaqstandyq qoǵamda birneshe naqty reforma bastalyp, jańa strategııalyq qujattar (onyń ishinde 5 ınstıtýttyq reforma) qabyldanyp, ár jylǵy jarııalanǵan Elbasynyń Qazaqstan halqyna joldaýlarynda «Nur Otan» partııasyna jańa kúrdeli tapsyrmalar berildi. Osyǵan baılanysty partııa baǵdarlamasyn qabyldanǵan strategııalyq qujattarǵa sáıkestendirý qajettiligi týyndap, kelesi onjyldyqqa 10 maqsatty jańa baǵdarlamanyń jobasy daıyndalyp, 27 aqpanda ótetin «Nur Otan» partııasynyń kezekti XVIII sezinde usynylatyn bolady.
− Jańa baǵdarlamanyń negizgi maqsaty týraly aıtsańyz?
– Jańa baǵdarlamanyń negizgi maqsaty – árbir qazaqstandyqtyń ómir súrý deńgeıin sapaly arttyrý úshin eldi júıeli jańǵyrtý. Sondyqtan da baǵdarlama 10 jyldyń ishinde ál-aýqatty qoǵamdy qurýǵa baǵyttalǵan. Jalpy, qoǵam ál-aýqatty bolý úshin, ár qazaqstandyq azamat, qazaqstandyq otbasy aýqatty bolýy qajet. Osyǵan baılanysty adamǵa baǵdarlaný memleket qyzmetiniń barlyq salalaryna enýi tıis.
– Baǵdarlama bilim berý máselelerin qamtı ma?
– Ekonomıkalyq ósý eń aldymen bilim sapasymen aıqyndalady. Iаǵnı, jastarymyzǵa qoljetimdi sapaly bilimmen qamtamasyz etý – partııanyń negizgi strategııalyq maqsaty retinde saqtalady. Osy maqsatty oryndaý úshin «bilim – oqytý» paradıgmasynan «bilim – tulǵanyń qalyptasýy» paradıgmasyna kóshý kózdelip otyr. Ýnıversıtetterde bilim berý sapasyn jaqsartý maqsatymen partııa birneshe naqty máselelerge nazar aýdaryp otyr. Olarǵa bilim berý úderisinde qoldanbaly bilimniń rólin kóterip, fýnksıonaldyq saýattylyqty damytýdy, qarqyndy tehnologııalyq jáne ǵylymı ózgerister nátıjesinde bolashaq mamandyqtardyń eńbek rynogynda suranysqa qajettiligin zertteý, jumys berýshilerdiń qatysýymen pánaralyq baılanystardy damytý negizinde jańa oqý baǵdarlamalaryn daıyndaý, oqý prosesine sıfrly tehnologııalardy aýqymdy engizýdi júzege asyrý, artyq eseptilik pen reglamentteýdi azaıtý, irgeli ǵylymdy damytý úshin jaǵdaı jasaý jatady. Damý ınstıtýttary qoldanbaly zertteýlerdi ǵana emes, irgeli sıpattaǵy ǵylymı ázirlemelerdi de qoldaýy tıis.
− Memlekettik jastar saıasatyn iske asyrýda «Nur Otan» partııasy qandaı oryn alatyn bolady?
– Partııanyń jańa baǵdarlamasynyń jobasynda negizgi strategııalyq maqsat – elimizde memlekettik jastar saıasatyn jetildirý. Búgingi jastarymyz aldyńǵy býyndarmen salystyrǵanda, sıfrly tehnologııalar álemimen tyǵyz baılanys, jekeshildikke nusqama, salamatty ómir saltyna baǵdarlaný sekildi birqatar ereksheliktermen sıpattalady. Osy erekshelikterdi eskere otyryp, partııa jastardy jan-jaqty qoldaýdy kúsheıtedi. Naqty aıtsaq, jastardy jumysqa ornalastyrý, jastardyń bıznes-bastamalary men startaptaryn damytý jónindegi baǵdarlamalardy júzege asyrýǵa qol jetkizý, jastar ókilderimen turaqty keri baılanys ornatý syndy aýqymdy sharalar partııanyń nazarynda bolady. Jumysqa turmaǵan jastardy áleýmettendirý úshin jaǵdaı jasaýymyz qajet.
Partııanyń negizgi maqsaty – jastarǵa memleket tarapynan jasalǵan jaǵdaıdy durys paıdalanýǵa baǵdar berý. Jergilikti atqarýshy organdar búgin júzege asyrylyp jatqan memlekettik áleýmettik baǵdarlamalardy jastar saıasatymen ushtastyrýy qajet. Partııa osy jumysty baqylaıtyn bolady. Jalpy aıtqanda, partııanyń jańa baǵdarlamasy joǵary oqý oryndarynda ınnovasııalyq bilim berý baǵdarlamalaryn iske asyrýǵa, jastardyń bilim deńgeıi men ómir súrý sapasyn jaqsartýǵa, olardyń básekege qabilettiligin arttyrýǵa baǵyttalǵan. «Nur Otan» partııasynyń jańa baǵdarlamasyn – jastarǵa qamqorlyq jasaýdyń jańa qadamy dep qabyldaımyz.
Hamıt ESAMAN,
«Egemen Qazaqstan»
Jambyl oblysy