Byltyr jyl basynan beri Shymkentten soltústik oblystarǵa 173 otbasy kóshýge nıet bildirgen. Tipti, 50 shaqty otbasy sonda qonys aýdaryp úlgergen.
Jýyrda Shymkent qalasyna arnaıy is-saparmen kelgen pavlodarlyq delegasııa qalalyqtarǵa óz usynystaryn aıtyp, soltústikke jumysqa shaqyryp qaıtty. 40 shaqty bos jumys ornyn usynyp otyrǵan pavlodarlyqtar 100-den asa otbasyn baspanamen qamtýǵa ázirmiz deıdi. Ál-Farabı aýdany ákimdiginde jergilikti halyqpen kezdesken qonaqtar soltústikke qonys aýdarýǵa arnalǵan memlekettik baǵdarlamany egjeı-tegjeıli túsindirdi.
Sondaı-aq qonys aýdaratyn otbasyna bir rettik járdemaqy men baspanany jalǵa alý aqysymen qosa kommýnaldyq tólemderi de tólenetindigin jetkizdi. Bul ıgilikti is «Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» aıasynda júzege asady.
О́tken jyly Shymkent qalasy jumyspen qamtý ortalyǵynyń mamandary ótinish bildirgen 81 otbasyn Soltústik Qazaqstan, Qostanaı, Pavlodar, Shyǵys Qazaqstan oblystaryna qonys aýdarýǵa yqpal etken. Osylaısha jumysqa qabiletti 300-ge jýyq turǵyn turaqty jumyspen qamtyldy deıdi jaýaptylar. Olar búginde muǵalim, dáriger, agronom sııaqty túrli mamandyqtar boıynsha jumysqa ornalasyp, tipti jeke kásipterin de dóńgeletip otyr. Qalalyq jumyspen qamtý ortalyǵy mamandary qunarly soltústik óńirde tórt túlikti túletýge múmkindik mol ekendigin aıtady. Bıyl jyl sońyna deıin 54 otbasyny qamtyǵan 200-den asa turǵyndy atalǵan óńirlerge qonys aýdartyp, eki qolǵa bir kúrek ustatý josparda bar eken.
Nurshat TО́KEN,
«Egemen Qazaqstan»
Shymkent