Almatyda qalasynda ornalasqan Tuńǵysh Prezıdenttiń saıabaǵynda ótken qysqy jarystyń ashylý saltanatynda uıymdastyrýshylar ár qatysýshyǵa ózimen birge 10 dosyn erte kelý jóninde usynys bildirgen edi.
Ondaǵy maqsat – 2020 jyly ótetin marafonǵa dál Eýropada elderindegideı 40 myń adam jınaý. 21 sáýirde «Almaty-marafony» ótedi, al búgin júgirý jarysynyń jańa maýsymy óz shymyldyǵyn ashty.
Saltanat Qazybaeva júgirýge nıet bildirýshilerdiń sany turaqty túrde ósip kele jatqanyn atap ótti: «Tirkelý merzimin biz úsh apta buryn bastaımyz. Bul jerde qatysýshylardyń sanyna shekteý bar. Bir apta qalǵanda tirkeý aıaqtalady. Osy qysqy jarysqa 1 200 adam tirkeldi. Úlken marafonǵa daıyndyq retinde barlyǵy tórt birdeı maýsymdyq básekeler ótkizýdi kózdep otyrmyz».
Qysqy jarysqa qatysqan túrli jastaǵy jáne túrli mamandyq ıeleri 10 shaqyrymdyq qashyqtyqty júgirip ótti.
Ishat Bekishev (54 jasta): «Sportpen shuǵyldanyp júrgenime birneshe jyl boldy. Maýsymdyq júgirý jarystaryn men jattyǵý retinde qarastyramyn. Osyndaı saıystar adam balasyna keremet sezim syılaıdy. Bizder úshin bul úlken mereke. Men árdaıym dostarym, tanystarym jáne áriptesterimdi júgirýge úgitteımin».
Baǵlan Mansurov (18 jasta): «Men stýdentpin, kóbine-kóp fýtbol oınaǵandy unatamyn. Marafondy da júgire bastadym. Osyndaı jarystar tamasha kóńil-kúı syılaıdy».
Iаna Nazaen (29 jasta): «Osyndaı sharalarda talaı qyzyqty adamdarmen kezdesesiń. Barlyǵynyń da ómirge degen kózqarsy ońdy. Osyndaı salaýatty ómir saltyn ustanǵan adamdarmen juzdesýdiń ózi úlken qýanysh».
Salavat Sıngatýllın (23 jasta): «Áý basta dárigerler maǵan júgirýge ruqsat bermegen edi. Desek te men ózimdi ózimniń oń jambasyma keletin – 21 shaqyrymdyq qashyqtyqqa júgiretin múgedekter sportynyń jalǵyz almatylyq ókili shyǵarmyn dep oılaımyn. Osy oraıda, barsha jurtqa óz densaýlyǵymyz – óz qolymyzda ekenin eskerte ketkim keledi».
Absolıýtti esepte alǵashqy oryndardy myna jelaıaqtar ıelendi: Áıelder – Anastasııa Chernaıa, Sáýle Dosjanova jáne Iýlııa Makarchýk. Erler – Mıhaıl Krasılov, Nurysbek Seksenbaı jáne Gennadıı Zelenskıı.
Ǵalym SÚLEIMEN,
«Egemen Qazaqstan»