Halyqaralyq Túrki akademııasynda (TWESCO) uıymnyń quryltaıshy memleketteri ókilderi «Túrki álemi geografııasy» oqýlyǵy mazmuny men oqý baǵdarlamasyn talqylady.
Úsh kúnge sozylǵan ǵylymı basqosýǵa Ázerbaıjan, Qazaqstan, Qyrǵyzstan, Túrkııa elderi Bilim jáne ǵylym mınıstrlikteriniń ókilderi, sarapshy-ǵalymdar qatysty.
Oqýlyq baǵdarlamasyn talqylaýǵa arnalǵan basqosýda sóılegen sózinde Akademııa basshysy Darhan Qydyráli: «Búgin biz talqylap otyrǵan oqýlyq arqyly balalarymyzdyń boıynda sonaý О́túkennen bastalyp, Balqanǵa deıin sozylǵan keń geografııalyq mekenge, kıeli jerlerge qatysty kózqaras qalyptasady. Bul - bárimiz úshin úlken olja, baılyq», - dedi. Sonymen qatar uıym basshysy oqý baǵdarlamasy sátti daıarlansa, oqýlyqtyń da sapaly bolaryn atap ótti.
Jıynda sarapshylar Túrki keńesine múshe elderdiń mektepterinde fakýltatıvtik pán retinde oqytylatyn «Túrki álemi geografııasy» oqýlyǵy men oqý baǵdarlamasyna qatysty oılarymen bólisti. Túrki memleketterinde geografııa pánin oqytýdyń erekshelikterin ortaǵa saldy. Sondaı-aq sarapshylar Halyqaralyq Túrki akademııasynyń ortaq oqýlyqty ázirleýde yqtııattylyq kórsetip, júıeli qyzmet atqarǵanyna rızashylyqtaryn bildirdi.
Esterińizge salar bolsaq, «Túrki álemi geografııasy» oqýlyǵy men oqý baǵdarlamasy 2018 jyldyń 3 qyrkúıeginde Sholpan-Atada ótken Túrki keńesi memleket basshylarynyń VI sammıti deklarasııasy men Túrki keńesi Bilim mınıstrleriniń 2015 jylǵy 5 qyrkúıekte Astanada ótken tórtinshi basqosýynda qabyldanǵan sheshimge sáıkes ázirlenýde. Budan buryn TWESCO «Ortaq túrki tarıhy» jáne «Ortaq túrki ádebıeti» oqýlyqtaryn ázirlegen bolatyn.