Shymkentte qalalyq Qazaqstan halqy Assambleıasynyń uıymdastyrýymen 1 naýryz – Alǵys aıtý kúni qarsańynda «Tarıhqa taǵzym» kúni atalyp ótti.
«Qazaqstan halqy Assambleıasy» ǵımaratynda deportasııa jyldary Qazaqstanǵa qonys aýdarǵan etnostar týraly «Taǵdyr toǵystyrǵan» atty kitap, foto, tarıhı qujattar kórmesi uıymdastyryldy.
Kórmege oqýshylar, stýdentter, jalpy jastar býyny ókilderi qatysyp, Qazaq jerine kúshtep qonys aýdarylǵan etnostardyń bastan keshkenderin, munda jergilikti halyq tarapynan qandaı qoldaýlarǵa ıe bolǵandyǵy jóninde derektermen tanysty.
Kórmege óńirlik qoǵamdyq-saıası tarıhy memlekettik arhıvi, Shymkent qalalyq saıası qýǵyn-súrgin qurbandary mýzeıi, qalalyq «Otyrar» ǵylymı-ámbebap kitaphanasy, bilim mekemeleri jáne etnomádenı birlestikter 200-ge tarta tarıhı-mádenı dúnıelerdi jurt nazaryna usyndy.
Sonaý tar zamanda Qazaq jerine kúshtep qonys aýdarylǵan ázerbaıjan etnosynyń úshinshi urpaǵy Arzý Gýrbanova qıyn-qystaý kezeńde ata-babalary qazaqtyń darhan dalasyna tap bolyp, osy beıbit kúnge esen-aman jetkendigin tebirene sóz etti.
«Tutastaı alǵanda HH ǵasyrdyń basynan bastap, Qazaqstanǵa 5,6 mıllıon adam kúshtep qonys aýdaryldy. Qazaq otbasylarynyń ózderi aýyr ekonomıkalyq jaǵdaılardy bastan keship, buryn-sońdy bolmaǵan repressııaǵa ushyrap jatsa da, qonystanýshylarǵa qoldaý kórsetti. Qazaq jerinen pana tapqandardyń arasynda bizdiń aǵa urpaq ókilderi de bar. Jergilikti halyq bas saýǵalap kelgenderdiń tilin túsinbese de óz baýyryndaı qarap, barymen bólisti. Meıirim jylýyn berdi. Qazir de túrli etnos ókilderine udaıy qamqor kózben qarap, báıterekteı saıa bolyp keledi. Qazaq halqynyń jaqsylyǵyn etnostardyń búgingi urpaqtary umytpaýy tıis», deıdi ázerbaıjan etnosynyń ókili.
Basqosýda munan ózge túrik, ıran, koreı, sheshen sekildi birqatar etnos ókilderi azapty jyldarda pana bolǵan qazaq eline aqedil alǵysyn aıtyp, patrıottyq taqyrypta jyr oqydy.
Nurshat TО́KEN,
«Egemen Qazaqstan»
Shymkent