Taıaýda Qazaqstannyń bostandyǵy men táýelsizdigi úshin kúreste zardap shekken tulǵalardy aqtaý, olardyń quqyǵyn qalpyna keltirý jáne erlikterin máńgi este qaldyrýda birqatar jumysty qolǵa alǵan «Qaharmandar» qoǵamdyq qorynyń negizi maqsat-mindetteri men qyzmetiniń baǵyttaryn kópshilikke tanystyrý boıynsha is-shara ótti.
Oǵan belgili jazýshy Aldan Smaıyl, Memleket tarıhy ınstıtýtynyń dırektory Búrkitbaı Aıaǵan, ınstıtýt dırektorynyń orynbasary Amangeldi Qashqynbaev, belgili jýrnalıst, «Egemen Qazaqstan» respýblıkalyq gazetiniń sholýshysy Jylqybaı Jaǵyparuly, kásipker Marat Nábıev qatysyp, sóz sóıledi.
Is-shara barysynda qordyń Astanadaǵy ókildigin uıymdastyrý boıynsha máseleler talqylanyp, qordyń Qamqorshylyq keńesiniń tóraǵasy bolyp tanymal memleket jáne qoǵam qaıratkeri Oralbaı Ábdikárimov saılandy. Sondaı-aq elimizdiń tutastyǵy úshin kúresken óńirdegi aqtalmaǵan jáne ulyqtalmaǵan aqtańdaqtardy aqtaý jáne erlikterin máńgi este saqtaý máseleleri sóz boldy.
Is-sharany uıymdastyrýshylardyń aıtýlaryna qaraǵanda, tujyrymdamany ázirleý kezinde tanymal ǵalymdar men qoǵam qaıratkerleri, akademıkter – Mámbet Qoıgeldi, Dıhan Qamzabekuly, Búrkitbaı Aıaǵan, Zııabek Qabyldınov, Talas Omarbekov, Amangeldi Aıtaly, Seıdahmet Quttyqadam jáne osy taqyryppen aınalysatyn zertteýshilerdiń de keńesteri paıdalanylǵan.
Qor ókilderi kópetnosty halqymyzdyń búgingi jáne bolashaq urpaǵyn patrıottyq rýhta tárbıeleý, sondaı-aq, Elbasynyń «Máńgilik el» strategııasy jáne «Rýhanı jańǵyrý» men «Uly dalanyń jeti qyry» baǵdarlamalaryn iske asyrýdy ıdeologııalyq jaǵynan qamtamasyz etýde, Otanymyzdyń azattyǵy men bostandyǵy jolynda jasalǵan erlikteri men qaharmandyq isterin nasıhattaý men jańǵyrtý jolynda jumys isteı beretinderin aıtty.
Eske sala ketsek, «Qaharman» qoǵamdyq qorynyń prezıdenti – belgili zańger, quqyq qorǵaýshy, bul máselelerdi tereń biletin azamat Sabyr Qasymov.