Astanada ótken «Nur Otan» partııasynyń XVIII sezinde Elbasy Nursultan Nazarbaev áleýmettik salaǵa 2 trıllıon teńgeden astam qarjy jumsalatynyn málimdedi. «Egemen Qazaqstan» saıty atalǵan somanyń qaı baǵytqa bólinetinin qarastyryp kórgen edi.
980 mıllıard teńge
Memleket basshysy 2019 jylǵy 1 shildeden bıýdjettik salanyń tómen jalaqyly jumyskerleriniń eńbekaqysyn 30 paıyzǵa deıin arttyrýdy; aýdandyq, oblystyq deńgeılerde tikeleı azamattarmen jumys isteıtin atqarýshy organdardyń tómengi qyzmetkerleriniń eńbekaqysyn ortasha 25 paıyzǵa kóterýdi tapsyrdy. Bul maqsattarǵa 2019-2021 jyldary qosymsha 980 mıllıard teńge bólinedi.
350 mıllıard teńge
Elbasy 2025 jylǵa deıin oblystyq jáne aýdandyq mańyzdaǵy joldardy jóndeýdi tapsyrdy. Osy maqsatty júzege asyrý úshin qosymsha 350 mıllıard teńge bólinedi.
«Sońǵy jyldary respýblıkalyq avtokólik jelileri qurylysy boıynsha asa zor, tarıhı mańyzdy jumystar júrgizildi. Tutastaı alǵanda, biz 12,5 myń km avtomobıl joly men 2,5 myń km temir jol, teńiz porttaryn saldyq jáne jóndeýden ótkizdik. Árıne, avtobandar salǵan mańyzdy, biraq úıge deıin jol salǵan odan da mańyzdyraq. Zamanaýı jergilikti joldar jelisin keńeıtý – bul oryndalýyn partııa baqylaýyna alýy tıis Úkimettiń sheshýshi mindeti. Atalǵan maqsattarǵa qosymsha 350 mıllıard teńge bólýdi tapsyramyn. Bul sharalar 2025 jylǵa qaraı oblystyq jáne aýdandyq mańyzdaǵy avtojoldardyń 95 paıyzyn jaqsartýǵa járdemdesedi» dedi N.Nazarbaev.
330 mıllıard teńge
Kommýnaldyq salany jetildirý úshin jalpy somasy 330 mıllıard teńge qarastyrylyp otyr. Sýmen jáne káriz júıelerimen qamtamasyz etý úshin qosymsha 140 mıllıard teńge, gazdandyrý jáne elektrmen qamtamasyz etý jumystaryna shamamen qosymsha 190 mıllıard teńge bólinedi.
300 mıllıard teńge
Qazaqstan Prezıdenti sondaı-aq múgedek bala tárbıelep otyrǵan ata-analarǵa, qamqorshylar men otbasylarǵa (tulǵalarǵa) járdemaqyny 30 paıyzǵa kóterýdi tapsyrdy. Bul shara 100 myńnan astam adamdy qamtıdy. Ony júzege asyrýǵa 2019-2021 jyldary qosymsha 300 mıllıard teńgeden astam qarajat bólý tapsyrylyp otyr.
180 mıllıard teńge
Elbasy óńirlik kólik ınfraqurylymdarynyń barlyq nysany, onyń ishinde aeroporttar, avto jáne temir jol vokzaldary jańǵyrtylýy tıis ekendigin atap kórsetti. Astana, Almaty jáne Shymkent sııaqty iri qalalardyń shet aýmaqtarynda qalyptasqan problemalardy sheshý úshin 2019-2021 jyldarǵa qosymsha 90 mıllıard teńge bólinedi.
Sondaı-aq aýyl halqynyń turmysyn jaqsartý maqsatynda «Aýyl – el besigi» arnaıy jobasy ázirlenbek. Ony júzege asyrý úshin 2019-2021 jyldary 90 mıllıard teńge kóleminde qarjy qarastyrylyp otyr.
120 mıllıard teńge
Elbasy densaýlyq saqtaý salasyn damytýǵa qosymsha 120 mıllıard teńge bólýdi tapsyrdy. Munyń nátıjesinde 7 óńirde jylyna 100 myń pasıentti qamtıtyn stasıonarlyq-medısınalyq kómek kórsetýdiń sapasy men qoljetimdiligi arta túsedi.
50 mıllıard teńge
Az qamtylǵan kóp balaly otbasylardy baspanamen qamtamasyz etý úshin jyl saıyn 50 mıllıard teńge bólinedi. Nátıjesinde «Nurly jer» baǵdarlamasy aıasynda 40 myńnan astam jaldamaly páter salynady.
«Bul maqsatqa taıaý jeti jylda qosymsha 50 mıllıard teńge jyl saıyn bólý qajet. Sonymen qatar tabysy tómen kóp balaly jáne tolyq emes otbasylar, múmkindigi shekteýli balalary bar otbasylar úshin baspana alýdyń qoljetimdiligin arttyrǵan jón. Azamattardyń osy sanattary úshin turǵyn úı jınaq júıesi arqyly jyldyq 2-3 paıyzben turǵyn úı qaryzdaryn usynýdyń jeńildikti tetikterin ázirleýdi tapsyramyn. Turǵyn úı jınaq bankine osy maqsatqa jyl saıyn 50 mıllıard teńge bólinetin bolady, dedi Elbasy.