Aqtóbe shekara otrıadynyń «Jaısań-avto» ótkizý bólimshesinde Reseıden Qazaqstanǵa qaraı «DAV» avtokóliginiń tirkemesinde jalpy salmaǵy 20 tonna kesilgen taqtaılar alyp kele jatqan 51 jastaǵy Qyrǵyz Respýblıkasynyń azamaty ustaldy. Bul týraly QR UQK ShQ baspasóz qyzmeti habarlady.
«Shekarashylar taqtaılar astyna jasyrylǵan 57 qap grek jańǵaqtaryn taýyp aldy. Ruqsat qujattary tek taqtaılarǵa ǵana rásimdelgen. Jańǵaq toltyrylǵan qaptar aktilenip Mártók aýdandyq ósimdikter karantıny men fıtosanıtarlyq baqylaý boıynsha bólimge tapsyryldy» delingen habarlamada.
Belgili bolǵandaı, dál osy ótkizý beketinde 35 jastaǵy qazaqstandyq Reseıge qaraı «Gazel» avtokóligimen ruqsat qujattarynsyz jalpy salmaǵy 2 400 kg tartatyn temirjol dóńgelekteriniń jubyn alyp ótpek bolypty. Júk Aqtóbe oblysy boıynsha Memlekettik kiris departamentine tapsyryldy.