Altaı aýdanynda Naýryz meıramy qarsańynda balalar qýanyshqa bólendi. Aýdan ákimi Nurjan Toqseıitovtiń bastamasymen alǵash ret az qamtylǵan jáne kópbalaly otbasylardyń balalaryna merekelik dastarhan jaıylyp, tátti-dámdiler taratylyp, shyǵarmashylyq ujymdar konsert berdi. Shara barysynda Naýryz tarıhy týraly teatrlandyrylǵan kórinis usynylyp, halyq ánderi shyrqalyp, bı bılendi.
Merekelik dastarhanǵa ulttyq kıimmen kelgen balǵyndar aýdan ákiminiń orynbasary Janna Asqarqyzynyń quttyqtaýyn tyńdady. «Naýryz merekesiniń tarıhy tym áride. Bul meıramnyń tárbıelik máni óte zor. Mundaı merekelik sharany budan bylaı aýdanymyzda dástúrli túrde, jyl saıyn Naýryz qarsańynda ótkizip otyratyn bolamyz. Búgin oqýshylarymyz qoıylym keıipkerlerimen birge ertegiler álemine enip, qazaq halqynyń salt-dástúri men ádet-ǵurpymen jan-jaqty tanysyp, Naýryz merekesiniń sımvoly – ásem de ádemi gúl – Jaýqazyn týraly maǵlumattar aldy», - deıdi J.Asqarova.
Shara sońynda ár balaǵa tátti-dámdiler salynǵan kúlek pen syılyq tartý etildi.
Azamat QASYM,
«Egemen Qazaqstan»
Shyǵys Qazaqstan oblysy,
Altaı aýdany