Halyqaralyq bilim quryltaıyn Shákárim atyndaǵy memlekettik ýnıversıtet ujymy uıymdastyrdy. Ýnıversıt rektory, professor Meıir Eskendirovtyń aıtýynsha, bilim quryltaıynnyń basty maqsaty, Qazaqstan Respýblıkasynyń Tuńǵysh Prezıdenti Nursultan Nazarbaevtyń Joldaýy men «Bolashaqqa baǵdar: Rýhanı jańǵyrý» baǵdarlamalyq maqalalaryn júzege asyrý maqsatynda sheteldegi qazaq dıasporasynyń basyn qosý bolyp tabylady.
- Sheteldegi qandastarymyz, túrki áleminiń ozyq ǵalymdary, qazaq dıasporasy rýhanııat týraly keń aýqymdy oı-pikirlerimen tájirıbe almasyp, Ulystyń Uly kúni Naýryzda Abaı elinde, qazaq jerinde bas qossyn, dep nıettendik,-dedi Shákárim ýnıversıtetiniń rektory Meıir Ǵarıpollauly,-bilim-ǵylym týraly ózara birlese eńbek etip, elimizge ozyq tehnologııalardy tartýymyz qajet. Bilimdi ekspertteýdiń ózi biz úshin asa mańyzdy. Jáne bıyl «Jastar jyly» dep jarııalanǵandyqtan bilimdi de kreatıvti jastarǵa qoldaý kórsetýimiz qajet.
Bilim quryltaıynda Shákárim ýnıversıtetiniń professory Arap Espenbetov alystan at aryltyp kelgen qonaqtarǵa izgi tilegin bildirip, Naýryz meıramymen quttyqtady. «Rýhanı jańǵyrý» jobalyq keńsesinde abaıtanýshy Ǵarıfolla Esim, tarıhshy-ǵalym Muhtarbek Kárimovter de sóz sóılep, ulttyq til, dúnıetanym jaıly dárister oqydy. Tarıhshy-ǵalym Ahmet Toqtabaı Tuńǵysh Prezıdenttiń «Uly dalanyń jeti qyry» maqalasyna oraı, stýdent qaýymǵa jylqy malynyń ereksheligi týraly dárisin oqyp, oılaryn ortaǵa saldy.
Elimizdiń ár túkpirinen jınalǵan stýdent jastar arasynda respýblıkalyq músháıra, sýretshiler, ánshiler baıqaýlary ótip, qazaq kúresinen «Shákárim barysy» týrnıri ótti. Quryltaıǵa qatysýshylar Shákárim eskertkishine taǵyzm etip, gúl shoqtaryn qoıǵan soń, mádenı shara bilim alańdarynda jalǵasty. Bilim alańdarynda «Foundation» jobasy boıynsha jumys isteıtin qazaq tilin úıretý ortalyǵynda qazaq rýhanııatyna jol tartar latyn álipbıi týraly keleli áńgime qozǵaldy. Jáne «AKME» klýbynda alystan kelgen qandastarymyzdyń qatysýymen qazaq rýhanııatyna qatysty oı talqy dúnıeler ortaǵa salyndy. Shaqyrylǵan qonaqtar arasynda Germanııa memleketi, Mıýnhennen Eýropa qazaqtar qaýymdastyǵynyń eks-tóraǵasy, saıasattaný ǵylymdarynyń doktory Abdýlkaıým Kesıjı, Túrkııa memleketi, Stambýl, Túrkııadaǵy qazaqtar qaýymdastyǵynyń tóraǵasy Fazyl Toplý, Fransııa, Parıjden Mádenıetaralyq bı jáne folklor qaýymdastyǵynyń tóraǵasy Nezıha Túrken jáne taǵy basqalary bar.
Raýshan NUǴMANBEK.
«EgemenQAZAQSTAN»
Sýretter avtordyki
SEMEI