Shaǵyn fýtboldan «Kaırat» pen «Jetisý» arasyndaǵy match aıaqtalǵannan soń Qazaqstan fýtbol federasııasy taǵaıyndaǵan «Elimizdiń eń úzdik qaqpashysy» júldesi almatylyq klýbtyń múshesi Igıtaǵa tabys etildi.
1986 jyly Brazılııanyń Rıo-de-Janeıro qalasynda týyp-ósken Igıta óz elinde birneshe jyl óner kórsetip, 2009 jyly Qazaqstanǵa qonys aýdardy. Alǵashqy maýsymdy Qaraǵandynyń «Tulparynyń» namysyn qorǵady. 2011 jyly Portýgalııanyń «Belenensıshine» aýysty. Kóp uzamaı bizdiń elge qaıta kelip, «Qaırattyń» jeıdesin kıdi. Almatylyq komandamen birge kóptegen halyqaralyq arenada tolaǵaı tabystarǵa qol jetkizdi. El chempıonatynda da san márte úzdik shyqty.
2013 jyly ol Qazaqstannyń azamattyǵyn alyp, ulttyq komandamyzdyń sapynda Eýropa chempıonatynda qola medaldi ıelendi. Basqa da jaýapty jarystarda óreli ónerimen kózge túsip, san mıllıon jankúıerdiń júregin jaýlady. «Umbro futsal awards» uıymynyń sheshimi boıynsha úsh márte álemniń eń úzdik qaqpashysy bolyp tanyldy.
Ǵalym SÚLEIMEN,
«Egemen Qazaqstan»