«Aqjaıyq» fýtbol klýby Astana qalasyna Nur-Sultan esimin berýdi qoldaıdy. Bul týraly zhaikpress.kz saıty habarlady.
«Táýelsizdiktiń 28-shi kókteminde Elbasymyz óz ókilettiliginen bas tartty. Tuńǵysh Prezıdentimizdiń tosyn sheshimi qazaqstandyqtar úshin kútpegen jaǵdaı bolǵany ras. О́tken ǵasyrdyń toqsanynshy jyldaryndaǵy qıyndyqtan eldi qutqaryp, qoı ústine boztorǵaı jumyrtqalaǵan búginimizge jetkizgen Elbasynyń jasaǵan eńbegine qazaq halqy ǵana emes, álem jurty da joǵary baǵa berdi.
Táýelsizdik jyldary ishinde elimiz talaı shyńdy baǵyndyryp, talaı belesten ótti. Elimiz Orta Azııa men TMD-daǵy kóshbasshy elge aınaldy. Arqa tósinde sáýleti kelisken jańa Astanamyz boı kóterdi. Bunyń barlyǵy - tuńǵysh Prezıdentimizdiń eńbegi. Oǵan eshkim talaspasy anyq.
Bıylǵy jyldyń 20 naýryzda el Prezıdenti Qasym-Jomart Toqaev astanamyzǵa Tuńǵysh Prezıdent – Elbasy Nursultan Nazarbaevtyń esimin berý týraly usynys jasady. Batys Qazaqstan oblysynyń «Aqjaıyq» fýtbol klýby bul usynysty tolyǵymen qoldaıdy. О́ıtkeni Elbasy - Qazaqstandy quldyraýdan qutqarǵan tulǵa. Sondaı-aq elimizdegi tatýlyq pen birlik - Tuńǵysh Prezıdentimizdiń salıqaly saıasatynyń arqasy.
Elimizde sporttyń, sonyń ishinde fýtboldyń damýyna da Elbasy súbeli úles qosty. Elimizde talaı sporttyq nysandar salynyp, birazy jóndeldi. Sport ınfraqurylymy jaqsaryp, sportshylarymyzdyń nátıjeleri ósti. Nursultan Nazarbaev Táýelsiz Qazaqstannyń damýyna orasan zor úlesin qosty. Onyń ishinde sport salasynyń órkendeýine úlken qoldaý jasap keldi. Elbasy basqarǵan kezeńde qazaqstandyq sportshylar eń mártebeli sporttyq dodalarda jeńiske jetip, ózderiniń jeńisterin Táýelsiz Qazaqstan men Nursultan Ábishulyna arnaǵanyna kýáger boldyq. Bul degenimiz - Elbasynyń sportqa úlken kóńil bóletininiń kórinisi.
Memleketti qurǵan adamnyń esimimen qalany ataý tájirıbesi bar. Máselen, Vashıngton qalasy barshaǵa málim. Nursultan atyndaǵy qalanyń bolǵany Táýelsizdiktiń sımvoly ispettes. Táýelsiz Qazaqstan men Nazarbaevtyń aty - sınonımder! Astanaǵa Nursultan Nazarbaevtyń esimin berý - naqty ári talas týdyrmas sheshim jáne el-halqynyń Elbasy eńbegine bergen baǵasy! «Aqjaıyq» fýtbol klýbynyń ujymy» delingen habarlamada.