«Nur Otan» partııasy Tóraǵasynyń Birinshi orynbasary Máýlen Áshimbaev Atyraýda ózenge sekirgen qyzdy qutqaramyn dep mert bolǵan polıseı qyzmetkerine baılanysty pikir bildirdi. Bul týraly M.Áshimbaev feısbýktegi paraqshasynda jazdy.
«Atyraý qalasyndaǵy qapyda bolǵan qaıǵyly oqıǵa barsha qazaqstandyqtardyń kóńilin qulazytyp ketti. Arystaı azamat Shalqar Kóshkinbaıulynyń oqystan bolǵan qazasyn bárimiz de aýyr kúızelispen qabyldadyq. Osyǵan baılanysty Shalqar baýyrymyzdyń artynda qalǵan anasy men aǵaıyn-týystaryna orny tolmas qaıǵylaryna ortaqtasyp, kóńil aıtamyz», dep jazady M.Áshimbaev.
Sonymen qatar Partııa Tóraǵasynyń Birinshi orynbasary Shalqardaı ul tárbıelep ósirgeni úshin Aqymǵalıevter áýletine qurmetin bildirdi.
«Shalqardyń bul erligi onyń antyna adaldyǵyn, eń bastysy, adamgershilik qasıetiniń joǵary bolǵanyn kórsetedi. Qyzmetine asqan jaýapkershilikpen qarap, ózge úshin óz ómirin qııýǵa daıyn bolǵan Shalqardaı ul tárbıelep ósirgeni úshin Aqymǵalıevter áýletiniń aldynda basymyzdy ıemiz.
Aldaǵy ýaqytta Shalqardyń batyl áreketin barsha qazaqstandyq jas býyn úlgi tutyp, elge qyzmet etýge talpynǵan jastardyń qatary kóbeıedi dep senemiz. Osy rette «Nur Otan» partııasynyń Shalqardyń erligin elge dáriptep, onyń otbasyna kómek qolyn sozýǵa óz úlesin qosatynyn atap ótkim keledi», delingen feısbýktegi jazbada.