Prezıdent Qasym-Jomart Toqaev Túrkistan qalasynyń jurtshylyq ókilderimen kezdesýde memleket qarjysyn únemdeýdiń mańyzyn túsindirip berdi.
«Úkimet bıýdjetti tek memleketimizdiń damýyna jáne qaýipsizdik maqsattaryna qaıta beıimdeýge tıis. Basty halyqaralyq forýmdar ótkizildi. Olardyń paıdasy zor boldy. Ásirese, EKSPO-ny erekshe atap ótken jón. Bul – jahandyq deńgeıdegi is-shara. Biraq qazir ortalyqta jáne jergilikti jerlerde ótkiziletin ımıdjdik is-sharalardy kúrt azaıtý kerek» dedi Q.Toqaev.
Memleket basshysy Úkimetke, ákimderge osyndaı tapsyrma júktegenin aıtyp, ysyrapshylyqqa memleket deńgeıinde tosqaýyl qoıý qajettigin atap kórsetti.
«Qazaqstannyń ekonomıkalyq jáne áleýmettik damýynyń mańyzdy faktorlary – deni saý ult, densaýlyq saqtaý salasyn damytý jáne salamatty ómir saltyn qalyptastyrý. Memlekettik shyǵystardyń basty mindeti – qarapaıym adamdardyń máselelerin sheshý. Turǵyndarymyzǵa taza aýyz sý, baspana, jumys oryndary, jaıly ómir úshin ınfraqurylym qajet», dedi Q.Toqaev.
Prezıdent osy mindetterdiń ońtaıly sheshilýi úshin birqatar sharalar atqarylatynyn aıta kele, «mınıstrler men ákimderdiń jumysyn naqty problemalardy sheshý nátıjeleri boıynsha baǵalaımyn» dedi.