Qasym-Jomart Toqaev «Samuryq-Qazyna» aksıonerlik qoǵamy basqarmasynyń tóraǵasy Ahmetjan Esimovti qabyldady. Bul týraly Aqorda habarlady.
Kezdesý barysynda Memleket basshysyna «Samuryq-Qazyna» aksıonerlik qoǵamynyń bıylǵy eki aıda atqarǵan jumystarynyń nátıjeleri týraly esep berildi jáne Qordyń damý strategııasyn júzege asyrý aıasyndaǵy josparlary jóninde baıandaldy.
Sonymen qatar, Qazaqstan Prezıdentine «Samuryq-Qazyna» aksıonerlik qoǵamynyń kompanııalaryn IPO-ǵa shyǵarý jáne Qor aktıvterin jekeshelendirý úderisteri jóninde málimdeldi.
Axmetjan Esimov Qor jumysynyń oń nátıjelerin atap ótti. Qor quramyna kiretin kompanııalar oń qarjy kórsetkishterin kórsetti. Qordyń iri segiz kompanııasynyń tabysy 2017 jylmen salystyrǵanda ulǵaıdy. Osylaısha, Qordyń kompanııalar tobynyń negizgi qyzmetinen túsetin tabysy 8,5 trln. teńgeden asty jáne 2018 jyly 35 %- ǵa artty.
Taza paıda 1,1 trln. teńgeni qurady, bul 2017 jylǵa qaraǵanda eki ese kóp. Dıvıdend kólemi eki eseden astamǵa artyp, 296 mlrd. teńgeni qurady. Qor kompanııalar tobynyń qaryz deńgeıi 1 trıllıon teńgege qysqardy. Syrtqy qaryz 4 mlrd. AQSh dollaryna qysqardy.
Memlekettik bıýdjetke aýdarymdardyń kólemi 1,1 trln. teńgeni qurady, bul 2017 jylmen salystyrǵanda 40% artyq. Oń óndiristik qarjylyq nátıjeler Qorǵa densaýlyq saqtaý, salaýatty ómir salty, medısına, bilim berý jáne qaıyrymdylyq salasyndaǵy áleýmettik baǵdarlamalardy júzege asyrýdy jalǵastyrýǵa jáne keńeıtýge múmkindik berdi.
Ahmetjan Esimov Memleket basshysyna aǵymdaǵy jylǵa Qordyń negizgi josparlary men mindetteri týraly baıandady. Osylaısha, Qordyń josparlary: «Qazaqtelekom» AQ men «Eır Astana» aksııalaryn IPO-ǵa shyǵarý, «Saryarqa» gaz qubyrynyń qurylysy, «Fly Arystan» avıa kompanııasyn iske qosý men bolashaq urpaq Qoryn qurýǵa baǵyttalǵan.
Kezdesý sońynda Qasym-Jomart Toqaev birqatar naqty tapsyrma berdi.