«Nur Otan» partııasy Tóraǵasynyń Birinshi orynbasary Máýlen Áshimbaevtyń tóraǵalyǵymen Demokratııalyq kúshterdiń «Qazaqstan-2050» jalpyulttyq koalısııasynyń kezekti otyrysy ótti. Jıyn Qazaqstan Respýblıkasynyń astanasyn Nur-Sultan qalasy dep qaıta ataýǵa qoldaý bildirý maqsatynda uıymdastyrylǵan. Otyrysqa eldegi jetekshi partııalardyń basshylary, Parlament depýtattary, Qazaqstan halqy Assambleıasynyń, kásibı jáne qoǵamdyq birlestikterdiń ókilderi qatysty.
Otyrysty ashqan M.Áshimbaev qazirgi tańda Qazaqstan halqynyń tarıhı kezeńdi bastan keshirip jatqanyn aıtty. Sondaı-aq ol Elbasynyń óziniń prezıdenttik ókilettigin toqtatý týraly sheshimi bir sátte qabyldanbaǵanyn, ol úshin Tuńǵysh Prezıdentimiz uzaq oılanyp, barlyq salany saralap, salmaqtaǵanyna nazar aýdardy.
– Elbasy el men halyqtyń múddesin birinshi kezekke qoıyp, árdaıym durys sheshimder qabyldaıdy. Sondyqtan Nursultan Ábishuly Nazarbaev qashanda bizdiń Elbasymyz, táýelsiz Qazaqstannyń negizin qalaýshy tulǵa, el ishinde jáne halyqaralyq arenada orasan zor bedelge ıe álemdik deńgeıdegi saıasatker, asa kórnekti reformator bolyp qala beredi. Onyń erik-jigeri men tabandylyǵynyń arqasynda Qazaqstan Táýelsiz memleket bolyp qalyptasty, – dedi partııa Tóraǵasynyń Birinshi orynbasary.
Budan bólek ol Elbasynyń Qaýipsizdik keńes tóraǵasy, Qazaqstan halqy assambleıasynyń jáne «Nur Otan» partııasynyń tóraǵasy retinde memlekettiń strategııalyq damýyna aıryqsha yqpal etetin tulǵa bolyp qalatynyn, ári qaraı da el damýynda Elbasy joly jalǵasatynyn jáne osy iste Tuńǵysh Prezıdentimizdiń esimin elordamyzǵa berýdiń mańyzy zor ekenin atap ótti.
Budan keıin sóz alǵan Qazaqstan kommýnıstik halyq partııasynyń hatshysy, Májilis depýtaty Jambyl Ahmetbekov tuńǵysh prezıdenttiń halyqqa úndeýin jarııalap, kelesi prezıdentke tapsyrýy – onyń el damýyndaǵy eleýli sheshim ekenine toqtaldy. Sonymen qatar ol Qazaqstan shekarasyn bekitýdegi Elbasynyń eńbegi eren bolǵanyn, ekonomıkalyq jáne qarjylyq daǵdarysqa ushyratpaı, turaqtylyqty saqtaýda qajyrly jumystyń jemisi, halyqtyń turmys sapasyn arttyrýǵa baǵyttalǵan reformalardyń júzege asyrylýynan bolǵanyn, óz partııa músheleriniń osy jolda erekshe qoldaý bildiretinin aıtty.
«Aýyl» halyqtyq-demokratııalyq patrıottyq partııasynyń tóraǵasy, Parlament Senatynyń depýtaty Álı Bektaev sonaý jyldary tuńǵysh prezıdenttiń el astanasyn Almatydan kóshirý týraly sheshimin shyǵarǵanda onyń bolashaǵyna senim artqandardyń az bolǵanyn jetkizdi. «Mine, búgin Elordamyz – nebári 20 jylda boı kótergen ásem qala. Osy qalanyń irgetasyn qalaǵan bas qalanyń arhıtektory – tuńǵysh prezıdentimiz», deı kele partııa atynan búgingi koalısııasyndaǵy úndeýlermen tolyq tanysqanyn jáne qoldaýǵa daıyn ekenin aıtty.