QR Premer-mınıstriniń orynbasary Jeńis Qasymbekov jumys saparymen Aqmola oblysynda bolyp, Atbasar jáne Astrahan aýdandary aýmaǵynan aǵyp ótetin Esil, Qalqutan jáne Jabaı ózderiniń sý tasqynyna qaterli aýmaqtaryn tekserdi, dep habarlaıdy oblystyq ákimniń baspasóz qyzmeti.
Aımaq basshysy Ermek Marjyqpaev atap ótkendeı, aýa raıy boljamdaryna sáıkes naýryzdyń 18-nen bastap oblystyq azamattyq qorǵanys júıesi joǵary daıyndyq rejimine kóshti. Sý tasqynynyń qateri Astrahan, Atbasar, Arshaly, Sandyqtaý jáne Selınograd aýdandarynda saqtalady. Barlyq óńirlerde shtab qurylyp, táýlik boıy jaǵdaıdy baqylaýda ustaýda jáne monıtorıng júrgizýde. Sondaı-aq, qajetti kúshter men qarajat daıyndaldy.
«Budan bólek, úkimettik top músheleri Atbasar qalasyndaǵy sý tasqynyna qaýipti aýmaqta ornalasqan №1 orta mektepte, 2017 jyly sý tasqynynan zardap shekkenderge arnalyp jańa turǵyn úıler salynǵan shaǵynaýdanda boldy. Qazirgi kezde qaýipti aýmaqta 419 turǵyn úı ornalasqan. Aldaǵy jyldary sý tasqynyń qaýipin boldyrmaý maqsatynda qosymsha taǵy 12 turǵyn úı salý josparda bar», deıdi Aqmola oblysy ákiminiń baspasóz qyzmeti.