Búgin túnde Qordaılyq shekarashylar Qyrǵyz Respýblıkasynan bizdiń elge qaraı jaıaýlatyp, Memlekettik shekarany buzyp ótpek bolǵan qyrǵyz azamatyn ustady. Bul týraly QR UQK ShQ baspasóz qyzmeti habarlady.
«Saǵat 02:30-dar shamasynda «Qordaı» shekara zastavasynyń aýmaǵynda shekara narıady túnde kóretin dúrbiniń kómegimen kórshi elden shekaraǵa qaraı kele jatqan bir adamdy baıqaǵan. Zastavadan shyqqan dabyl toby tún qarańǵylyǵyn paıdalanyp, Memlekettik shekaranyń qorshaýynan ótip, bizdiń aýmaqqa qaraı ene bergen «shaqyrylmaǵan qonaqty» qarsy aldynan kútip aldy», delingen habarlamada.
Belgili bolǵandaı, eshqandaı qujaty joq adam ózin 28 jastaǵy Qyrǵyz Respýblıkasynyń azamatymyn dep tanystyrdy. Bul týraly quqyq qorǵaý oryndaryna habarlandy. Qazir tekserý sharalary júrip jatyr.