Aksııaǵa Shyǵys Qazaqstan oblysy ákiminiń orynbasary Erlan Aımuqashev, Semeı qalasynyń ákimi Ermak Sálimov, oblystyq ishki saıasat bólimi bastyǵynyń orynbasary Aıdar Sadyrbaev, Shákárim memlekettik ýnıversıtetiniń professory Arap Espenbetov jáne ardager-aqsaqaldar qaýymy, jastar, stýdentter, túrli ulttar men ulystar, zııaly qaýym qatysty.
- Qurmetti halqym! Saryarqa tórinen oryn alǵan elordamyzdyń sándi-saltanatty túrde qalaǵa aınalýyna Tuńǵysh Prezıdent Nursultan Nazarbaevtyń qosqan úlesi zor,- dedi qala ákimi Ermak Sálimov, - keshegi arman búgin mine, aqıqat. Máńgilik el bolýdy ańsadyq. Oǵan qol jetkizdik. О́zge eldermen terezesi teń elge aınalýymyz da Nursultan Ábishulynyń eńbegi. Prezıdentimiz kóregen saıasatynyń arqasynda ult kóshbasshysy atandy. Osy rette Elbasy Nursultan Nazarbaevtyń esimin máńgi saqtaý úshin bastalǵan bastama, usynys «Nur-Sultan» ataýyn astanaǵa berilýin tolyq qoldaımyz.
- Qazaqstannyń Tuńǵysh Prezıdenti Nursultan Nazarbaev Máńgilik elimizdiń irgetasyn qalaýshy, halqy úshin baqytty ǵumyr, baıandy jol sala bergen tulǵa,- dedi Shákárim ýnıversıtetiniń professory Arap Espenbetov, - barlyǵymyz úshin Astana, Qazaqstan uǵymy egiz. Sondyqtan da el birligi artyp, Elbasy salǵan dara da dana joldy jalǵaı bergenimiz jón.
Semeıdegi soǵys jáne eńbek ardagerleri keńesiniń tóraǵasy Amantaı Doǵalaqovtyń aıtýynsha, Tuńǵysh Prezıdenttiń eńbegi zor, máselen, onyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýynda kóptegen mańyzdy máseleler qozǵaldy. Jastar úshin «Smart Sity» jáne «IT» syndy taǵy basqa da oqý, bilim berý salalaryndaǵy jańa tehnologııalardy dendep engizý qajettigin aıtýy bolashaqtyń qamyn oılaýy. «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýynda aıtylǵan ekonomıkany órkendetý talaptaryna oraı ekonomıka, qarjy salasyndaǵy bilikti mamandardy daıarlaýdyń da mańyzdylyǵy joǵary turatyny ras. Táýelsizdik alǵan jyldardan bastap, ekonomıkaǵa erekshe mán berip, ishki-syrtqy saıasatty bir jolǵa qoıa bilgen Nursultan Nazarbaevtyń qurmeti úshin Astana ataýy «Nur-Sultan» bolyp ózgergendigin men tolyq qostaımyn, dedi Amantaı Doǵalaqov.
- Jastarǵa senim artqan ult kóshbasshysynyń aldyǵa qoıǵan talap-tilekterin, maqsat-murattaryn iske asyrýda búgingi urpaq bar bolmysymen, ynta-yqylasymen el úshin qyzmet etýge ázir, - dedi «Nur Otan» partııasy janyndaǵy «Jas Otan» jastar qanatynyń Semeı qalalyq bóliminiń jetekshisi Almas Aıtmuqash, - ótkenimizdi saralaı qarasaq, tuńǵysh Prezıdenttiń syndarly saıasatynyń arqasynda Qazaqstan taıǵaq keshýlerden súrinbeı ótti.
Shara sońynda aksııaǵa qatysýshy oblys ákiminiń birinshi orynbasary Erlan Aımuqashev jınalǵandarǵa jyly lebizin bildirip, el birligi men yntymaǵy úshin eńbek ete berýge, Elbasy jolyn jalǵap, qoǵamdy kórkeıte túsýge shaqyrdy. Jıyn sońy konserttik baǵdarlamaǵa ulasty. Qaladaǵy óner ujymdary erekshe kóńil kúımen aksııany jalǵastyryp áketti.
Raýshan NUǴMANBEKOVA,
«Egemen Qazaqstan»
SEMEI