«Astana LRT» elordada úsh avtobýsqa qatysty jol-kólik oqıǵasy boıynsha jańa málimetterdi jarııalady. Bul týraly QazAqparat tilshisi habarlady.
«26 naýryz kúni Uly Dala men Qabanbaı batyr dańǵyly qıylysynda úsh avtobýstyń jáne jeńil kólikterdiń soqtyǵysýymen jol-kólik oqıǵasy boldy. Qala mańy baǵdaryndaǵy № 303 avtobýs № 12 baǵdardaǵy jolaýshylar kóligimen soqtyǵysty. Osynyń ekpinimen olar № 53 avtobýsqa jáne jedel járdem kóligine baryp soǵyldy», - dedi «Astana LRT» JShS qoǵammen baılanys departamentiniń basshysy Naýat Azanbaeva.
Osy oraıda ol apattyń mán-jaıy qazirgi kezde naqtylanyp jatqanyn atap ótti. «Aldyn ala málimet boıynsha zardap shekken adamdar bar. Jol-kólik oqıǵasy saldarynan 53-shi baǵdar men birneshe jeńil kólik qaqtyǵysty. Oqıǵa boıynsha qosymsha málimetti habarlaıtyn bolamyz», - dedi ol.
Aıta ketý kerek, elorda polısııasy kóz jumǵan adamdar týraly aqparatty rastady.
«Úsh avtobýsqa qatysty jol-kólik oqıǵasy tirkeldi. Apattyń sebebi anyqtalýda. Aldyn ala málimet boıynsha 303-shi baǵdardyń júrgizýshisi men jolaýshysy oqıǵa ornynda kóz jumdy», - delingen Polısııa departamentiniń habarlamasynda.