QR Úkimetiniń baspasóz ortalyǵynda ótken baspasóz konferensııasynda Premer-Mınıstrdiń Birinshi orynbasary – qarjy mınıstri Álıhan Smaıylov Prezıdenttiń bıýdjet salasynyń tómen jalaqy alatyn jumyskerleriniń eńbekaqysyn kóterýdi a. j. 1 shildesinen 1 maýsymyna shegerý boıynsha tapsyrmasynyń oryndalý barysy týraly aıtyp berdi.
Premer-Mınıstrdiń Birinshi orynbasary – qarjy mınıstri Álıhan Smaıylov bıýdjet salasynyń tómen jalaqy alatyn jumyskerleriniń eńbekaqysyn kóterý merzimin aýystyrý qosymsha 37,8 mlrd teńgeni qajet etetinin jetkizdi.
«Nur Otan” partııasynyń kezekti sezinde aǵymdaǵy jyldyń 1 shildesinen bastap bıýdjet salasynyń tómen jalaqy alatyn jumyskerleriniń jalaqysyn jalpy 30%-ǵa deıin jáne aýdandyq, oblystyq deńgeıdegi memlekettik organdardyń tómengi jumyskerleriniń jalaqysyn orta eseppen 25%-ǵa kóterý týraly tapsyrma berildi, sol kezde biz 169,7 mlrd teńge shamasyndaǵy qarjylandyrý kólemin 2019 jylǵa arnalǵan respýblıkalyq bıýdjet jobasyna saldyq. Bul qarajatpen bir jarym mıllıon adam qamtylady. Jýyrda QR Prezıdenti Q. Toqaevtyń jalaqyny kóterý merzimin 1 shildeden 1 maýsymǵa shegerý qajettigi týraly tapsyrmasy berildi, ıaǵnı, bir aı buryn iske asyrylatyn bolady, osyǵan baılanysty bul maqsattarǵa qosymsha 37,8 mlrd teńge baǵyttaý kózdelip otyr», — dep túsindirdi A. Smaıylov.
Onyń aıtýynsha, alýshylar sol qalpynda qalady: olar túrli kásip ıesi bolyp tabylatyn tabysy tómen bir jarym mıllıon adam.
«Shyǵyndar kóleminiń ózgerýi boıynsha tıisti usynystar qazir Memleket basshysyna kelisýge jiberildi, odan keıin jaqynda olar Parlamentke joldanatyn bolady», — dep naqtylady qarjy mınıstri.