Ortalyq kommýnıkasııalar qyzmetiniń aqparat alańynda Prezıdent janyndaǵy Adam quqyqtary jónindegi komıssııanyń kezekti otyrysy ótti. Jıynǵa komıssııa tóraǵasy Igor Rogov, memlekettik organdardyń ókilderi, Parlament depýtattary, ombýdsmender, halyqaralyq jáne úkimettik emes uıymdar, advokatýra, bilim berý uıymdarynyń ókilderi, sondaı-aq qoǵam men buqaralyq aqparat quraldarynyń ókilderi qatysty.
Otyrysta elimizdiń jańa Konstıtýsııasynyń quqyq qorǵaý áleýetin, azamattardyń zııatkerlik menshik nysandaryna quqyqtaryn saqtaý men qamtamasyz etý máseleleri talqylandy.
Komıssııa tóraǵasy Igor Rogov otyrysty asha otyryp, jýyrda qabyldanǵan jańa Ata zańymyzdyń memlekettiń quqyq qorǵaý áleýetin aıtarlyqtaı kúsheıtetinin atap ótti. Onyń aıtýynsha, jańa Negizgi zańda azamattardyń jeke, saıası jáne áleýmettik-ekonomıkalyq quqyqtarynyń kepildikteri edáýir keńeıtilgen. Atap aıtqanda, adam kapıtalyn damytýǵa erekshe mán berilgen. Advokatýranyń róli kúsheıtilgen. Sonymen qatar konstıtýsııalyq tájirıbede alǵash ret sıfrlandyrý jaǵdaıynda azamattardyń quqyqtaryn qorǵaýdy retteıtin normalar engizilgen.
Budan bólek, I.Rogov elimizdiń jańa Konstıtýsııasy «Ádiletti Qazaqstandy» qurýdyń negizi bola otyryp, qoǵam men memleket arasyndaǵy senimniń jańa arhıtektýrasyn qalyptastyratynyn atap ótti.
Alǵashqy másele boıynsha, ıaǵnı elimizdiń jańa Konstıtýsııasynyń quqyq qorǵaý áleýeti týraly Adam quqyqtary jónindegi ýákil Artýr Lastaev baıandama jasady. Ol jańartylǵan Konstıtýsııada alǵash ret adam jáne azamattyń quqyqtary men bostandyqtaryn múltiksiz saqtaý qaǵıdaty bekitilip, olardyń basymdyǵy aıqyndalǵanyn aıtty. Bul, atap aıtqanda, Negizgi zańnyń ekinshi bóliminiń ataýynyń «Negizgi quqyqtar, bostandyqtar men mindetter» bolyp ózgerýinen kórinis tapqan.
Artýr Lastaev baıandama barysynda Konstıtýsııanyń negizgi jańalyqtaryna erekshe nazar aýdardy. Máselen, Mıranda qaǵıdalaryn engizý, ádil sot talqylaýynyń negizgi kepildikterin adamnyń irgeli quqyqtaryna arnalǵan bólimge aýystyrý, sonyń ishinde ózine jáne jaqyndaryna qarsy aıǵaqtar bermeý quqyǵy, kinásizdik prezýmpsııasy, bir is-áreketi úshin qaıta jazalaýǵa jol bermeý syndy basymdyqtarǵa toqtaldy.
Ádilet mınıstri Erlan Sarsembaev mınıstrliktiń azamattardyń zııatkerlik menshik nysandaryna quqyqtaryn saqtaý jáne qamtamasyz etý baǵytyndaǵy qyzmeti týraly baıandady. Mınıstr zııatkerlik menshik máseleleri ádilet organdary qyzmetiniń strategııalyq baǵyttarynyń biri ekenin atap ótti.
«2025 jyly zııatkerlik menshik máselelerine qatysty zań jobasy aıasynda belsendi jumys júrgizdik. Birinshiden, taýar belgisin 3 aı ishinde jedel tirkeý múmkindigi engizildi. Bul óz taýarlaryn onlaın platformalar men marketpleısterge shyǵaratyn jeke jáne zańdy tulǵalardyń, ásirese shaǵyn jáne orta bıznes ókilderiniń kóptegen ótinishine jaýap boldy. Ekinshiden, bul avtorlyq qoǵamdar qyzmetindegi aýqymdy reforma boldy. Bul qadamǵa avtorlardyń syıaqylardyń tólenbeýine, roıaltı jınaý men bólýdiń kóleńkeli shemalaryna qatysty kóptegen shaǵymy túrtki boldy. Zańsyz aınalym kólemi ondaǵan mıllıard teńgege deıin jetýi múmkin, al resmı túrde 1,7 mlrd teńge ǵana málimdelgen, onyń ishinde avtorlarǵa nebári 53%-y ǵana úlestirilgen», dedi Ádilet mınıstri.
Bir sózben aıtqanda, avtorlyq qoǵamdardyń qyzmetine aýqymdy reforma júrgizilgen.
Otyrys qorytyndysynda komıssııa músheleri usynǵan usynystar hattamaǵa engizilip, memlekettik organdarǵa joldandy.