BAQ úshin uıymdastyrylǵan is-sharaǵa «QazMunaıGaz» UK AQ basqarma tóraǵasynyń óndiris jónindegi orynbasary Jaqyp Marabaev, «Mańǵystaýmunaıgaz» AQ bas dırektorynyń birinshi orynbasary Baqyt Imanbaev, «QazMunaıGaz» óndirý jáne burǵylaý tehnologııalary ǵylymı-zerttý ınstıtýty» JShS Bas dırektory Baqytjan Hasanov, «Munaı-gaz ǴJZI» AQ bas dırektory Oleg Gershtanskıı qatysty. Jaqyp Marabaev jınalǵandardy osy jyldyń 13 naýryzynda «Mańǵystaýmunaıgaz» AQ-ǵa qarasty Qalamqas ken ornynyń kúrdeli ýchaskesinde uńǵymanyń qurylysy barysynda tehnogendik sıpattaǵy gaz-sý aralas tabıǵı burqaq shyqqany týraly habardar etti. Naýryzdyń 13-24 kúnderi mamandar uńǵymany kúrdelendirilgen burǵylaý eritindisimen jýý, sondaı-aq grıfondardy joıý úshin jóndeý-oqshaýlaý jumystaryn júrgizdi. Qoldanǵan sharalarǵa qaramastan, 25 naýryz kúni jer betine shyqqan gaz-sý qospasynyń oshaǵy jana bastady. Mańǵystaý oblysy boıynsha Tótenshe jaǵdaı departamentiniń bastyǵy Q.B. Bazarbaevtyń basshylyǵymen TJ, ekologııa, polısııa, ortalyq memlekettik organdar, QMG, «Mańǵystaýmunaıgaz» AQ, «SıBÝ» JShS jáne Mańǵystaý oblysy ákimdigi ókilderinen qurylǵan jedel shtab órt oshaǵyn aýyzdyqtaý boıynsha qajetti sharalardy qabyldady. Tótenshe jaǵdaıdy joıý úshin 80-nen astam maman jáne 25 túrli tehnıka jumyldyryldy. Sóndirý barysynda janý oshaǵyn tasymaldanatyn lafettik oqpandarmen aýyzdyqtaý úshin jumystar júrgizildi. 28.03.2019 j. saǵat 01.05-te №8237 uńǵymasy mańaıyndaǵy grıfonda shyqqan órt aýyzdyqtaldy. Qazirgi tańda gaz-sý aralas tabıǵı burqaqtyń jer betine shyǵýy toqtatyldy jáne paıda bolǵan grıfondar jabyldy. Zardap shekkender men qaza bolǵandar joq. Aldyn ala málimetter boıynsha, materıaldyq shyǵynnyń kólemi shamaly. «QazMunaıGaz» UK AQ basqarma tóraǵasynyń óndiris jónindegi orynbasary Jaqyp Marabaev óz sózinde paıda bolǵan órt – bul Qalamqas ken ornyn ıgerý jaǵdaıyna tán qubylys ekenin atap ótti. -Árıne, biz qashanda osyndaı oqıǵalarǵa daıyn bolýymyz kerek – bul úshin osy sııaqty qaýip-qaterler týyndaǵan kezde ýaqtyly jáne sapaly áreket etý boıynsha arnaıy reglamentter ázirlengen. Mundaı jumystarǵa biliktiligi asa joǵary, óndiristi jete biletin jáne mol tájirıbesi bar munaıshy-mamandar qajet ekenin basa aıtqym keledi. 8237 uńǵymadaǵy órtti aýyzdyqtaý úshin eńbek etken barlyq áriptesterime alǵys bildiremin. Olardyń otbasy múshelerine aıtarym – endi qaýip joq, ýaıymdamańyzdar, dedi ol. Qazirgi kezde nysanda qaıta qalpyna keltirý boıynsha keshendi jumystar júrgizilýde. Mamandar aldaǵy ýaqytta osyndaı tótenshe jaǵdaılardyń aldyn alý úshin jan-jaqty tehnıkalyq saraptamalar júrgiziletin bolady. Saraptamalardyń nátıjesi boıynsha, Qalamqas ken ornynyń ortalyq bóligindegi uńǵymalardy jobalaý kezinde burǵylaý uńǵymalarynda júrgiziletin jumystardyń qaýipsizdigin jáne sapasyn qamtamasyz etý úshin arnaıy túzetý sharalary qabyldanatyn bolady.
Mańǵystaý oblysy