Aqmola oblysyna jumys sapary barysynda Shýchınsk qalasynyń Joǵary pedagogıkalyq kolledjiniń jastarymen kezdesý ótkizildi. Vıse-Premer Jastar jylyn ótkizý jónindegi jol kartasy aıasynda 5 negizgi baǵyt boıynsha 80-nen astam is-shara iske asyrylyp jatqanyna basa nazar aýdardy.
Sharalar jastardy baspanamen qamtý, jumyspen qamtý, bilim berýdi damytý, volonterlik, ǵylymı granttar berý, áleýmettik belsendilikti keńeıtý, jas otbasylardy qoldaý, densaýlyq jáne áleýmettik ınklıýzıvtilik máselelerin qamtıdy.
Búginde kolledjde «Bastaýysh bilim berý», «Mektepke deıingi tárbıe men oqytý», «Dene shynyqtyrý jáne sport», «Kásiptik oqytý», «Mýzykalyq bilim berý», «Negizgi orta bilim» mamandyqtary boıynsha 1 myńnan astam stýdent bilim alyp jatyr. Eńbekpen qamtylý úlesi 97% quraıdy. Stýdentter memlekettik jastar saıasatyna qoldaý bildire otyryp, ózderiniń kreatıvti usynystary men ıdeıalaryn jetkizdi.
Sonymen qatar, Býrabaı aýdanynyń Kenesary aýylynyń, Birjan sal aýdanynyń Makınka aýylynyń jáne Bulandy aýdanynyń Altyndy aýylynyń halqymen kezdesýler ótkizildi.
«Árbir baǵyt ólshenetin kórsetkishterimen, tetikterimen jáne solarǵa arnaıy bólingen qarajattarmen naqty ári aıqyn sharalardan turady. Olar halyqtyń áleýmettik osal toptaryn qorǵaýdy kúsheıtýge, sondaı-aq olardyń ál-aýqatyn arttyrýǵa múmkindikter men jaǵdaılar jasaýǵa jol ashady. Azamattardyń ál-aýqaty solarǵa baılanysty. Qolynan keletinniń bári eńbek etýge mindetti. Al dene múmkindikterine nemese ózge de sebepterge baılanysty jumys isteýge múmkindikteri joq azamattarǵa memleket áleýmettik qoldaý kórsetýde», — dedi G. Ábdiqalyqova.
Premer-Mınıstrdiń orynbasary kóp balaly jáne az qamtylǵan otbasylarǵa da bardy. Tilek Tólegenniń otbasynda mektep jasyndaǵy 4 bala bar. «Eńbek» ónimdi jumyspen qamtý jáne jappaı kásipkerlikti damytý baǵdarlamasy aıasynda 2 mln 200 myń teńge kóleminde shaǵyn nesıe alǵan otaǵasy 10 iri qara mal satyp alǵan. Aýyl bıznesmeni óz otbasyn tolyq qamtamasyz etip qana qoımaı, jańa jumys oryndaryn da ashyp otyr. G. Ábdiqalyqova oblys basshylyǵyna osyndaı oń tájirıbelerge jan-jaqty qoldaý kórsetýdi tapsyrdy.
Jumys tobynyń músheleri Aqmola oblysynyń basqa aýdandary men aýyldarynda da boldy.
Bilim jáne ǵylym mınıstri K. Shámshıdınova birqatar bilim berý nysandaryn aralady. Olardyń arasynda «Aısha» jáne «Baldyrǵan» balabaqshalary, AT-lıseı, Sh. Ýálıhanov atyndaǵy Kókshetaý memlekettik ýnıversıteti, Kókshetaý qalasyndaǵy Joǵarǵy tehnıkalyq kolledj, Zerendi aýdanyndaǵy Shaǵalaly aýyly Joǵarǵy agrotehnıkalyq kolledji, Zerendi aýylyndaǵy M. Ǵabdýllın atyndaǵy mektep-ınternat, Aqkól balalar úıi bar.
2018 jyly Elbasy tapsyrmasy boıynsha jańa attestattaý júıesine sáıkes sanattaryn rastaǵan jáne jańartylǵan bilim mazmunymen jumys isteıtin mektep muǵalimderiniń jalaqysy 30-50%-ǵa kóterilgeni belgili. Maýsym aıynan bastap mektepke deıingi bilim berý uıymdarynyń tárbıeshileri men tárbıeshilerdiń kómekshileri t. b. úshin saralanǵan jalaqy 30%-ǵa deıin artady. Sonymen qosa, oblysta úsh aýysymdyq oqytý máselesin sheshý úshin 7 nysannyń jáne oqýshylardyń oryn tapshylyǵyn joıý úshin bir nysannyń qurylysy júrip jatyr. Bıyl 280 oryndyq 1 balabaqshany paıdalanýǵa engizý, 1075 oryndyq 10 mektepke deıingi uıymdy ashý jáne jumys istep turǵan 120 oryndy keńeıtý josparlanǵan.
Respýblıkalyq bıýdjet qarajaty esebinen 8,2 mlrd teńge somasyna 7 nysan salynyp jatyr. Onyń ishinde 2 nysandy 2019 jyly paıdalanýǵa berý kózdelgen.
Densaýlyq saqtaý mınıstri E. Birtanov jumys sapary aıasynda Bulandy, Eńbekshilder, Stepnogor jáne Aqkól aýrýhanalarynyń medısına qaýymymen kezdesti. Densaýlyq saqtaý júıesiniń qyzmetkerlerine alǵashqy medısınalyq-sanıtarlyq kómektiń sapasy men qoljetimdiligin arttyrý, eńbekaqyny kóterý, salany sıfrlandyrý t.b. boıynsha qabyldanyp jatqan sharalar túsindirildi.
«Nur Otan» partııasynyń hatshysy F. Qýanǵanov Esil jáne Astrahan aýdandarynyń turǵyndarymen kezdesý barysynda Elbasy N. Á. Nazarbaev «Nur Otan» partııasyna 4 jańa jobany iske qosýdy tapsyrǵanyn atap aıtty, olar: ınjenerlik jáne áleýmettik ınfraqurylymdy damytýǵa basymdyq berýmen «Qutty meken»; aýyldy damytýǵa baǵyttalǵan «Aýyl – El besigi»; kóp balaly jáne az qamtylǵan otbasylardy qoldaý boıynsha «Baqytty otbasy»; partııanyń Qoǵam qabyldaýlary negizinde halyqtyń áleýmettik qorǵalatyn tobyn qoldaýǵa baǵyttalǵan «Halyqqa kómek» biryńǵaı áleýmettik terezesi.
Sonymen qatar, jumys tobynyń árbir múshesi azamattarǵa jeke qabyldaýlar ótkizip, oblystaǵy aýyldar men qalalardyń turǵyndarymen kezdesti.
Eske sala keteıik, QR Premer-Mınıstriniń orynbasary G. Ábdiqalyqova bastaǵan Úkimettiń jumys tobynyń quramyna eńbek jáne halyqty áleýmettik qorǵaý mınıstri B. Saparbaev, bilim jáne ǵylym mınıstri K. Shámshıdınova, densaýlyq saqtaý mınıstri E. Birtanov, Qurylys jáne turǵyn úı-kommýnaldyq sharýashylyq isteri komıtetiniń tóraǵasy M. Jaıymbetov, «Nur Otan» partııasynyń hatshysy F. Qýanǵanov, «Atameken» UKP basqarma tóraǵasynyń orynbasary L. Ramazanova, sondaı-aq BAQ ókilderi men blogerler kirdi. Elbasynyń «Áleýmettik qamqorlyq» jańa áleýmettik sharalaryn túsindirý maqsatymen el óńirlerine jumys saparlary jalǵasatyn bolady.