«Ákimderdiń esep berý formatynyń eskirgeni, baıandamalarynyń jadaǵaı sıfrlarǵa qurylatyny, shyn máninde halyqty jalyqtyrdy jáne jurtshylyqtyń senimine selkeý túsiredi dep oılaımyn. Bizdiń keıbir sheneýnikterimizge jetpeı jatatyny – qarapaıymdylyq, adamı qarym-qatynastar. «Ákim bol – halqyńa jaqyn bol» dep halyq beker aıtpaıdy. Olarǵa osy sóz boıtumar bolýy tıis», dedi Memleket basshysy «Egemen Qazaqstan» jáne «Aıqyn» gazetterine bergen suhbatynda.
Sondaı-aq ákimderdi jınaǵan keńeste muny eskertkenin, halyqtyń suranysyna jedel ún qatyp, máseleni shuǵyl sheshý qajettigin tapsyrǵanyn atap ótti.
«Halyqqa ashyq qyzmet kórsetýge qajetti barlyq kommýnıkasııalyq quraldardy paıdalana bilgen jón. Sonymen birge keri baılanys ornatýdyń paıdasy zor. О́kinishke qaraı, halyqpen tóte baılanys barlyq jerde birdeı emes, baılanys ortalyqtary elimizdegi 17 ákimdiktiń tek tórteýinde, al mobıldi halyqtyq baqylaý 7 óńirde ǵana bar. Mundaı jaǵdaıda atqarýshy bılik eldiń muń-muqtajyna der kezinde jaýap qata almaıdy. Osy ýaqytqa deıingi ońtaıly reformalardyń bári jergilikti jerlerge kelip tireledi. Eger halyqpen qoıan-qoltyq jumys atqaratyn bolsa, ákimdikter kóptegen ózekti máselelerdi tıisti deńgeıde tez sheshe alady. Bul azamattardyń bılik ınstıtýtyna degen senimin arttyrady. О́ńir ákimderi halyqpen eseptik kezdesýlerde ǵana emes, turaqty negizde kezdesip, barlyq eldi mekendi aralaýǵa tıis» dedi Q.Toqaev.
Budan keıin júrgizilip jatqan reformalardyń, júzege asyrylyp jatqan memlekettik saıasattyń mán-maqsatyn halyqqa naqty ári uǵynyqty jetkize bilýdiń mańyzy týraly aıtyp berdi.
«Memlekettik basqarý akademııasynyń bazasynda arnaýly kýrstar ashyp, olarǵa halyqpen belsendi qarym-qatynas jasaıtyn sheneýnikterdi jiberý kerek dep uıǵardym. Ákimderge halyqpen qarym-qatynastyń jańa formatyna kóshýdi, ashyq jáne shuǵyl áreket etýdi tapsyrdym. Bul aýdandardan bastap oblysqa deıingi barlyq deńgeıdegi ákimderge qatysty. Olardyń halyqpen tikeleı qarym-qatynasta bolýy, jaǵdaıdy tolyqqandy bilýi, máseleni jedel sheshýi – basty mindet», dedi Prezıdent.