Túrkistan qalasyn damytý boıynsha qala ákimi Álipbek О́serbaev baıandama jasady. Ol oblys ákiminiń tapsyrmasyna sáıkes, tıisti sharalar qolǵa alynyp, júıeli túrde jumystardyń atqarylyp jatqanyn málimdedi.
«Qala aýmaǵynda 10 gúlzar salý týraly jumysty úılestirý baǵytynda, halyq kóp shoǵyrlanǵan ortalyq kósheler boıynan kópshilik paıdalanatyn qoǵamdyq oryndardyń sanyn arttyrý maqsatynda birneshe alańshalardy ashý josparlanyp otyr. Osyǵan sáıkes, negizgi kósheler boıynan jalpy aýmaǵy 172,2 gektardy quraıtyn qolaıly jerler anyqtaldy. Búginde sol aýmaqtardaǵy 148 túrli baǵyttaǵy nysandy memleket muqtajdyǵyna alý jumystary júrgizilýde» dedi qala basshysy.
Sondaı-aq, qala ákimi shahardaǵy ǵımarattardyń qorshaýlary men jol boıyndaǵy temir sharbaqtardy alyp tastalatynyn aıtty. Bul jumystar nátıjesinde qalanyń shyraıyn arttyrady dedi. Sonymen qatar, jıynda qala ortalyǵyndaǵy bazarlardy syrtqa shyǵarý boıynsha tıisti jumystar júrgizilip jatqany da aıtyldy. Osy maqsatta qala syrtynan jalpy kólemi 25 gektar bolatyn jer telimi anyqtalǵan. Bazarlarǵa usynylatyn jerlerdiń ınfraqurylymyn júrgizýge jobalyq-smetalyq qujattamalardy daıyndaý úshin jergilikti bıýdjetten qarjy qaralǵan.
Baıandamamen tanysyp shyqqan oblys basshysy qalany damytýǵa baǵyttalǵan jumystardy júıeli túrde ýaqytyly atqarýdy jáne oblys ortalyǵyna laıyq jańadan salynýy tıis birqatar jobalardy atady.
«Oblys ortalyǵynda halyq ýaqytyn tıimdi ótkizetin oryndar men medısınalyq mekemeler ashylý kerek. Osyǵan baılanysty Túrkistan qalasynda 10 shaǵyn fýtbol alańy men 10 tennıs korty salynýy tıis. Odan bólek, munda ıppodrom men muz saraıy boı kóterýi qajet. Mádenıetiń ordasy retinde opera teatryn salýdy da tapsyramyn» dedi oblys ákimi.
Al, Túrkistan oblysy boıynsha Memlekettik kirister departamentiniń bastyǵy Álibek Tilegenov 2019 jylǵa salyq salý bazasyn keńeıtý boıynsha mindetter týraly baıandama jasady. Onyń sózinshe, búgingi kúngi basty mindetterdiń biri, bıýdjetke túsetin salyqtar jáne mindetti tólemder boıynsha bereshek somalardy azaıtý. Bul rette, departament basshysy bereshegi bar boryshkerlerdiń oblys jáne aýdanaralyq qaıta tirkeýden ótýine jol bermeý, jalǵan kásipkerlikpen kúresý maqsatynda, Memlekettik kirister organdary, Ádilet organdary jáne Azamattarǵa arnalǵan úkimet arasynda Memorandým uıymdastyryp, oryndalýyn qatań baqylaýǵa alý qajettigin aıtty.
Kirister departamentiniń jumysymen tanysqan shyqqan oblys basshysy jumysty júıelendirip, tıisti sharalardy qolǵa alýdy tapsyrdy.