«Kásibı áskerılendirilgen avarııalyq qutqarý qyzmetteriniń respýblıkalyq ortalyq shtaby» jaýapkershiligi shekteýli seriktestigi «Aqberen» Mańǵystaý fılıalynyń 4 jedel-aldyn alý jumysy jónindegi ınjeneri jáne 15 qutqarýshysynan quralǵan jedel top oqıǵa ornynda avarııalyq-qalpyna keltirý jumystaryn júrgizip, kezekshilik qyzmet atqarýda.
Qalamqas ken orny №8237 uńǵymasyndaǵy jalyn toqtaǵannan beri onda apattyq-joıý jumystarynyń jospary jasaqtalyp, «Aqberenniń» jedel toby uńǵyma saǵasynda kezekshilik tártibimen bólshekteý jumystaryn jasaýda. Saǵa shahtasy tazalanyp, O 426 shegendeý baǵanynyń joǵary bóligi tegisteldi. O 426 mm baǵanyna baǵanalyq flanestiń montajy jasalyp, gıdravlıkalyq qosarlanǵan oımaly preventor qurastyryldy. Preventordy basqarýdyń negizgi pýlti iske qosyldy.
Burǵylaý eritindisine arnalǵan ydystar qambadan shyǵarylyp, uńǵyma aýmaǵynan árige alynyp tastaldy. Osydan soń, burma jelileri montajdalǵan. Uńǵyma saǵasyndaǵy gaz-aýa ortasyna metandy anyqtaýǵa arnalǵan ólsheý únemi jasalynyp, ol teris nátıje kórsetip tur.
Qalamqas ken ornynda «KÁAQQ ROSh» JShS-i «Aqberen» Mańǵystaý fılıalynyń «Ýral-44202» jedel vahtalyq kóligi, «Ýral-44202» jedel júk kóligi, «Sang Iong» kóligi jáne «Kamaz-43118» bazasyndaǵy jyljymaly jóndeý sheberhanasy, buranda kesýge arnalǵan stansııasy bar gıdravlıkalyq qurylǵy, qolmen turba keskish, stansııasy bar gıdravlıkalyq gaıkakeskish syndy birqatar tehnıka men qural-saımandar qoldanyldy. Tereńdigi 903 metrlik №8237 uńǵymasyn burǵylaý kezinde gaz-sý qospasy janyp, órt aýmaǵy shamamen 900 sharshymetrdi qurap, bıiktigi 10 metrge deıin jalyn atqylaǵan bolatyn. Aqberendikter ken ornyna 25 naýryz kúni kelip jetti. 28 naýryz kúni jalyn sónip, komıssııanyń sheshimimen, órtengen uńǵymany joıýǵa daıyndyq jumystaryn júrgizý tapsyrylǵan «Aqberen» Mańǵystaý fılıalynyń qutqarýshylary búginde bólshekteý jumystaryn aıaqtaýda.
«Kásibı áskerılendirilgen avarııalyq qutqarý qyzmetteriniń respýblıkalyq ortalyq shtaby» jaýapkershiligi shekteýli seriktestigi «Aqberen» Mańǵystaý fılıalynyń baspasóz qyzmetiniń habarlaýynsha, seriktestiktiń 19 qutqarýshysy 9 kún boıy Qalamqas ken ornynda kezekshilikte bolyp, jóndeý-qalpyna keltirý jumystaryn abyroımen atqardy. Aýa-raıynyń qolaısyzdyǵy men apattyń zardabyna qaramastan, jedel top músheleri tapsyrmany múltiksiz oryndap shyqty.
Mańǵystaý oblysy