Ol barlyq álemdik dinder men rýhanı oı mektepteri sybaılas jemqorlyqty aıyptaıtynyn, al bóten múlikti zańsyz ıemdený men paraqorlyq kúná ekenin aıtty. «О́tken eki jyly 2,5 myń meshitte juma namazynyń aldynda «Paraqorlyq pen jemqorlyqtyń qasireti» ýaǵyzdary oqyldy. Agenttik dinı qyzmetkerlerdi sybaılas jemqorlyqqa qarsy aǵartý máseleleri boıynsha daıyndaý maqsatynda dinı birlestikter úshin 300-den astam semınar uıymdastyrdy. Osy salanyń 15 000-nan astam ókili búginde qajetti aqparat pen daǵdyǵa ıe», – dedi A.Shpekbaev.
Al agenttik tóraǵasynyń orynbasary Oljas Bektenov óskeleń urpaqtyń elimizdiń mektepke deıingi mekemelerinde, mektepterinde, kolledjderi men joǵary oqý oryndarynda sybaılas jemqorlyqqa qarsy tárbıemen jáne oqytýmen qamtylǵanyn aıtady. «Adamdardyń sybaılas jemqorlyqtan sanaly túrde alshaq júrýi mańyzdy. Mundaı senim adamnyń adamgershilik jáne rýhanı damýy arqyly bolýy múmkin. Meshit, shirkeý, ǵıbadathana, sınagoga jáne basqa da dinı ǵımarattar – bul adamgershilik tárbıe ortalyqtary. Dinı rásimderdi, ýaǵyzdardy oryndaý kezinde sybaılas jemqorlyqtyń kúná ekendigi týraly únemi túsindirýdi tájirıbege engizýdi suraǵym keledi», – dedi ol din ókilderine.
Aıta keteıik, Qazaqstanda 15 dinı bilim berý uıymy, meshitter men jeksenbilik mektepter janynda 400 bastaýysh kýrstary, dinı ǵımarattardan tys jerlerde dinı is-sharalardy ótkizýge arnalǵan 383 úı-jaı, dinı ádebıetter men dinı mazmundaǵy ózge de aqparattyq materıaldardy, dinı maqsattaǵy zattardy taratýǵa arnalǵan 257 arnaıy turaqty úı-jaı jumys isteıdi.
ALMATY