«Keler jyldan bastap «Bıýdjetke qatysý» pılotty jobasyn bastaýdy usynamyn, munda ár aýdanǵa naqtyly soma aýdarylady, al ony turǵyndardyń ózderi mańyzdy baǵyttar boıynsha bóletin bolady», - dep málimdedi qala ákimi Baýyrjan Baıbek.
«Bıýdjetke qatysý» jobasy boıynsha qala turǵyndarynyń usynysy «Open Almaty» júıesi arqyly qabyldanady. Júıede aqparat jarııalanǵannan keıin daýysqa salý arqyly úzdikter anyqtalady. Jalpy qala aýdandaryna bólinetin qarjy qala bıýdjetiniń bir paıyzyn quraıdy, bul shamamen 4 mlrd. teńge.
Qazirgi kezde Almaty ákimdigi ozyq tájirıbeler negizinde tıimdi ári únemdi jumsaý qaǵıdasy boıynsha bıýdjet shyǵyndaryn ońtaılandyrýda. «Nur Otan» partııasynyń fraksııasymen birge bıýdjet shyǵyndaryna qosymsha saraptama júrgizildi, sondyqtan Qoǵamdyq keńestiń qaraýyna taǵy 7 mıllıard teńgeden astam qarjyny qysqartý usynylady. Qala ákiminiń aıtýynsha, BUU-nyń usynystaryna sáıkes damyǵan elderdiń bıýdjeti osylaısha 0,5% dan 1%-ǵa deıingi kólemde jasaqtalady. Mundaı bastama Londonda, Rımde, Berlınde, Parıjde, Máskeýde engizilgen.
«Biz úshin qoǵamdyq pikirdi estý ǵana emes, bıýdjettik sheshimderdiń oryndalýyna jaýapkershilikti kúsheıtý ári azamattyq bastamalardy qarjylandyrý mańyzdy. Mundaı kózqaras óz qalasyna degen jaýapkershilikti nyǵaıtady. Al qala basqarmalary keri baılanys arnalary arqyly iri jobalardy turǵyndarmen, bıznespen, sarapshylarmen birge talqylaǵandary jón. Qoǵamdyq keńes músheleri barynsha belsendilik tanytýlary tıis dep esepteımin» dep atap ótti qala basshysy Baýyrjan Báıbek.
Qala jobalary turǵyndar tarapynan talqylanyp, bıýdjet te qala jurtshylyǵynyń usynysy negizinde qurylady. Al ákimdikte shaǵymdar men usynystar únemi zerttelip otyrady. Almaty ákimdiginiń barlyq áleýmettik jelilerde resmı akkaýnttary bar, Instagram paraqshasynda tirkelgender sany búginde eki júz myń shamasynda. Kún saıyn «Open Almaty» biryńǵaı júıesine 500 ótinish tússe, barlyǵy da saraptalyp, nazarǵa alynady.